Díli, 08/01/2024, Vise-Prezidente Komisaun Ezekutiva Bee Timor-Leste, Empreza Públika (BTL, E.P) ba Asuntu Sistema Bee, Saneamentu no Drenajen, Sr. Gustavo da Cruz enkontru dahuluk ho Diretór DNRAS Sr. Belarmino Freitas Gomes dos Santos ho ekipa, iha sala reuniaun ezekutiva BTL, E.P, Caicoli.
Enkontru ne’e, hodi ko’alia kona-bá destakamentu pesoál ou funsionáriu hosi DNRAS nian, ba iha intake Maloa, Lacoto Mutudare no Benamauk, tuir despaixu S.E Ministru Obras Públikas (MOP) nian, katak BTL, E.P ho DNRAS tenke halo koordenasaun atu oinsá servisu Estadu nian bele la’o di’ak. Tanba ne’e, ohin BTL, E.P konvida DNRAS, hodi deskute asuntu ne’e bazeia ba baze legál ne’ebé eziste, atu nune’e wainhira, hala’o funsaun iha terrenu, labele mosu dezentendimentu entre tékniku operadór BTL, E.P no pesoál ou funsionáriu DNRAS nian.
Durante iha reuniaun ne’e, Diretór DNRAS hatete prezensa pesoál ou funsionároiu DNRAS nian iha intake hirak ne’e, la’ós atu halo knaar BTL, E.P nian, maibé atu fó apoia de’it tékniku BTL, E.P nian iha estasaun hirak ne’e. Tanba tuir monitorizasaun hosi DNRAS katak, tékniku ne’ebé destakadu iha intake sira menus ou limitasaun tékniku, ho nune’e DNRAS reforsa tan sira nia pesoál hodi apoia ekipa BTL, E.P, hodi asegura sistema intake sira ne'e.
Hafoin rona tiha esplikasaun hosi Diretór DNRAS ho ekipa, Vise-Prezidente KE BTL, E.P BTL, E.P ba Asuntu Sistema Bee, Saneamentu no Drenajen apresia ba apoia ne’e no husu ba pesoál DNRAS ne'ebé destaka iha intake sira ne'e, atu koopera ho tékniku operadór BTL, E.P nian iha terrenu.
Enkuantu, pesoál ne’ebé DNRAS destaka ba intake hirak ne’e, hamutuk nain neen no intake ida ema nain rua. Ba intake Tohumeta, daudaun ne’e, sei prepara hela kondisaun ou uma ba operadór sira, wainhira konstrusaun uma finaliza, mak sei destaka mos pesoál ba fatin ne’e.
Fahe ba Sosial Media:
