Bobonaro, 03/05/2023. Ekipa nasionál hosi Diresaun Enjeñaria no Investimentu (DEI) Bee Timor-Leste, Empreza Públika (BTL, E.P), lori kompañia sira bá hala’o site visit ba fatin ne'ebé planeia ona, atu implementa projetu Melloramentu Sistema Fornesimentu Bee Moos no Supply & Installation Prefabricated Liner Tank, iha Postu-administrativu Balibo, munisípiu Bobonaro.
Atividade site visit ne'e, hala’o durante loron rua, hahú hosi loron 02 to'o 03 fulan maiu tinan ne'e, ho objetivu hodi lori kompañia sira ne’ebé sosa ona dokumentu projetu nian, bá observa fatin ne'ebé iha futuru sei implementa projetu sistema bee moos, atu nune'e wainhira kompañia ida ne’ebé mak manan tender ne'e, bele hatene ona fatin hirak ne’e, hodi hala’o servisu tuir dezeñu ne’ebé mak prepara ona hosi ekipa DEI BTL, E.P.
Planu ba implementasaun projetu melloramentu sistema bee moos ne'e, sei kobre suku Balibo Villa, aldeia tolu hanesan aldeia Atara, Fatuk Kakae no Amandato. Projetu ne'e mos, sei instala rezervatóriu prinsipál unidade ida (liner tank), tanke BPT unidade ida, tanke distribuisaun unidade tolu no tanke sedimentasaun unidade rua. Enkuantu supply prefabricated liner tank ne’e ho volume metru kúbiku 290 (90m3).
Durante site visit ne'e, akompaña hosi Administradór postu-administrativu Balibo no tékniku BTL, E.P munisípiu Bobonaro nian. Alende ne’e, autoridade lokál no komunidade sira mos koopera tebes, atu implementa projetu melloramentu sistema bee moos ne’e iha postu Balibo.
Orsamentu ne'ebé prevé ba projetu Melloramentu Sistema Fornesimentu Bee Moos ne'e $ 705,947.41, enkuantu fundu ba projetu Pakote Supply & Installation Prefabricated Liner Tank ho montante $ 74,753.74
Fahe ba Sosial Media:
