Díli, 26/12/2024. Vise-Prezidente Komisaun Ezekutiva (KE) Bee Timor-Leste Empreza Públika (BTL, EP) ba Asuntu Tékniku, Sr. José Filipe Ximenes Smith akompaña hosi Diretór Operasaun no Manutensaun (DOM) observa lixu ne’ebé butuk hamutuk iha fatin lixu nian no balun soe iha valeta laran inklui namkari estrada públiku besik iha estasaun sistema bomba Comoro C, zona 1.
Ezekutivu BTL, E.P tun ba haree direta lixu iha estasaun bomba Comoro C ne’e, tanba tuir informasaun hosi tékniku operadór BTL, E.P zona 1 no pesoál seguransa iha estasaun refere katak, lixu hirak ne’ebé so’e hamutuk iha lixeira besik iha estasaun bomba Comoro ne’e, kuaze semana rua ona, pesoál saneamentu munisípiu Díli seidauk raut, nune’e akontese udan iha loron hirak liu ba, provoka iis makaas iha aredores ne’e nomos bee fo’er labele sirkula tuir valeta, tanba lixu balun soe nakonu iha valeta laran, hodi rezulta intupidu, nune’e bee fo’er sira hosi lixeira ne’e, sulin tama fali ba estasaun sistema bomba Comoro C nian. Ho kestaun ne’e, BTL, E.P preokupa, tanba bele akontese kontaminasaun bee fo’er iha estasaun bomba ne’e no bele fó impaktu ba ema-nia saúde.
Tanba ne’e ohin, to’o iha terrenu, Vise-Prezidente KE BTL, E.P ba Asuntu Tékniku, informa kedas ba parte Autoridade Munisípiu Díli nian, hodi husu ba sira atu rekolla lalais lixu hirak ne’e no BTL, E.P mos sei haruka tan karta ofisiál ba AMD, atu bele halo intervensaun imediatu, hodi muda dook lixeira refere hosi estasaun bee moos ne’e.
Enkuantu, sistema bomba Comoro C mak durante ne’e hodi fornese bee ba tanke rezervatóriu Gologota nian, hafoin distribui fila-fali ba konsumidór sira iha área Tasi-Tolu, Golgota, Raikotu no aldeia 04 de Setembro.
Fahe ba Sosial Media:
