Ermera, 22/03/2024. Vise-Prezidente Komisaun Ezekutiva Bee Timor-Leste Empreza Públika (BTL, E.P) ba Asuntu Boa Governasaun no Fortalesimentu Institusionál, Sra. Elizabeth Amaral partisipa iha selebrasaun Loron Mundiál Bee, ne’ebé realiza iha suku Lihu, postu-administrativu Railaco, munisípiu Ermera. Seremónia ne’e, organiza hosi DNRAS liuhosi kooperasaun ho parseiru Unicef, PARTISIPA, ADRA no PN-BESI-TL, ho tema mundiál “Water for Peace/Bee ba Paz” no iha Timor-Leste tema ba tinan ida ne’e mak “Valoriza Bee Haburas Dame”. Seremónia ne'e realiza iha suku Lehu, postu-administrativu Railaco, munisípiu Ermera.
Selebrasaun Loron Mundiál ba tinan ida ne'e, hodi hafanu parte hotu-hotu tantu Governu, parseiru dezenvolvimentu sira, Autoridade Munisípiu lideransa suku no aldeia inklui komunidade sira, atu tau importánsia ba setór bee, tanba bee mak fó moris, laiha bee laiha moris. Ho nune’e, ba entidade hotu ne’ebé partisipa iha seremónia ne’e, atu servisu hamutuk hodi hadi’a no rezolve problema bee iha TL no hasa’e rekursu bee.
Iha intervensaun Diretora-Jerál DNRAS hatete, selebrasaun loron mundiál ne’e fó hanoin ba ema hotu atu antesipa krize global bee nomos esforsu oin-oin hodi ajuda dezenvolve bee ne’ebé sustentavel no sei la husik ema ida kotuk atu la asesu ba bee. Tema "Valoriza Bee Haburas Dame”, ida ne'e refleta ba kondisaun moris ema hotu iha Timor-Leste nomos bazeia ba Planu Estratéjiku Dezenvolvimentu Nasionál tinan 2011-2030 ne’ebé ho objetivu ida ba dezenvolvimentu sustentável ho nia metas atu asegura disponibilidade no jestaun sustentável bee ba ema hotu to’o tinan 2030.
Reprezentante Autoridade Munisípiu Ermera iha nia intervensaun husu ba lideransa suku no komunidade atu tau importánsia no valoriza bee. Nomos husu atu uza bee ho kuidadu, wainhira bee nakonu tenke taka torneira sira no tenke tau matan no labele estraga sistema kanalizasaun bee ne'ebé Governu instala ona. Alen de ne'e husu mos komunidade atu kuida aihoris ne’ebé ohin kuda ona, atu nune’e bele evita erozaun no hamosu bee matan foun.
Reprezentante Autoridade Munisípiu Ermera informa mos, iha munisípiu Ermera populasaun pursentu 81 (81%) mak asesu ona bee moos no pursentu 19 (19%) seidasuk asesu ba bee moos. Hosi abitante 19% ne’ebé seidauk asesu bee ne’e, tanba sira hela iha foho leten no bee iha kraik, nune’e difikulta hodi hetan bee, maibé autoridade relevante sei nafatin buka alternativa hodi kanaliza bee ba populasaun sira ne’ebé seidauk asesu bee moos.
Iha ámbitu Loron Mundiál ba tinan ida ne’e, ho atividade oin-oin hanesan realiza entrevista eskluziva, Semináriu Nasionál iha Díli, Sosializasaun no Konservasaun liuhosi kuda ai-oan iha Ermera. Atividade hirak ne’e hodi fó hanoin no hakle’an ema hotu nia konsiénsia kona-bá importánsia hosi bee ne’e rasik, oinsa atu bele proteje bee, jere ho di’ak atu ema hotu bele hetan bee. Tanba iha TL, ema barak mak seidauk asesu ba bee. Iha okaziaun ne'e, DNRAS no WaterAid TL asina mos MoU hodi servisu hamutuk ba ba setór bee.
Entidade sira ne'ebé partisipa iha seremónia ne'e, mak representante Vise-Primeiru-Ministru ho delegasaun, reprezentante Autoridade Munisípiu Ermera ho ekipa, parte seguransa Ermera, Parseiru Internasionál no Nasionál, Ministériu Obras Públikas MOP, Lideransa suku, Parte Igreja, estudante no komunidade Railaco.
Fahe ba Sosial Media:
