Díli, 30/01/2025. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Tékniku, Sr. José Filipe Ximenes Smith akompaña hosi Diretór Operasaun no Manutensaun (DOM), Aleixo dos Santos, partisipa iha forum diskusaun ba bee no saneamentu ho tema “Reforsa Koordenasaun no Kooperasaun Servisu entre Parte Interesada sira ba Dezenvolvimentu Setór Bee no Saneamentu iha Timor-Leste”. Forum diskusaun ne’e organiza hosi Plataforma Nasionál Bee, Saneamentu no Ijiene Timor-Leste (PN-BESI-TL) no realiza iha sala reuniaun ADTL, Mascarenhas.
Objetivu hosi forum ne’e, atu haforsa liu tan komunikasaun no kooperasaun servisu ne’ebé efetivu entre Governu no parseiru dezenvolvimentu sira hotu ba hamosu kompromisu integradu ida, hodi dezenvolve bee moos no saneamentu iha territóriu nasionál.
Entidade sira ne’ebé partisipa iha forum ne’e, mak hosi governu, ajénsia internasionál, NGO internasionál no nasionál sira ne’ebé servisu iha área bee moos no saneamentu hanesan PLAN, Mary Mackillop Today, Unicef, DNRAS, SMASA, PN-BESI-TL, BTL, E.P, SEEAS, ADTL, MAE, FHTL, Smile no partispante relevante sira seluk.
Fahe ba Sosial Media:
