Díli, 08/08/2024. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P), ba Asuntu Sistema Bee, Saneamentu no Drenajen, Sr. Gustavo da Cruz akompaña hosi Jestór Operasaun no Manutensaun (O&M) ho ekipa kontinua observa servisu melloramentu sistema bee ne’ebé paralelu ho projetu estrada no valeta, iha Marconi, Díli.
Objetivu hosi vizita ne’e, hodi observa direta servisu fíziku liu-liu melloramentu sistema bee ne’ebé paralelu ho projetu estrada no drenajen iha terrenu. No halo mos koordenasaun ho enjeñeiru kompañia nian inklui MOP ne’ebé akompaña hela projetu fíziku iha terrenu, hodi haree oinsá atu instala liña distribuisaun sira iha área ne’e.
Iha biban ne’e, Vise-Prezidente KE BTL, E.P, ba Asuntu Sistema Bee, Saneamentu no Drenajen husu ba Jestór O&M ho ekipa, atu nafatin kria koordenasaun di’ak ho kompañia nomos presiza identifika didi’ak fatin sira ne’ebé hodi instala liña distribuisaun sira no tenke instala tuir regras no orden, atu nune’e ba futuru labele difikulta ba servisu operasaun no manutensaun.
Servisu melloramentu sistema bee ne’e paralelu ho projetu reabilitasaun estrada no drenajen sira iha kapitál Díli, nune’e wainhira projetu rua ne’e finaliza, parte rua koordena hodi instala kedas sistema bee iha estrada no drenajen ninin, atu nune’e ba futuru labele ke’e estraga tan estrada.
Fahe ba Sosial Media:
