Lautém, 13/03/2023, Tékniku Operadór (TO) Bee Timor-Leste, Empreza Públika (BTL, E.P) munisípiu Lautém hamutuk ho Empregadór sira halo melloramentu ba kanu estragus, iha Lautém.
Kanu ne’ebé estragus ne’e, tanba feruzen, nune’e rezulta kanu ku’ak, hodi difikulta distribuisaun bee ba komunidade sira. No kanu hirak ne’e liga ba komunidade uma kain ualu.
Alende ne’e, tékniku sira kontinua dezliga balun ne’ebé liga ba komunidade nia uma rua ne’ebé abondona, iha bairo Hudi-Laran, aldeia Bee Moris, suku Fuiloro, postu-administrativu Lospalos.
Iha loron hanesan, Koordenadór BTL, E.P munisípiu Lautém oferese materiál ba Xefe Aldeia Vataomar, suku Fuat, P.A Iliomar, hodi halo melloramentu ba sistema bee moos iha sira nia fatin.
Materiál hirak ne’e, BTL, E.P oferese ba aldeia Vanaomar, suku Fuat, bazea ba proposta ne’ebé autoridade lokál sira hato’o ba BTL, E.P, no ikus mai, aprova hosi Prezidente Komisaun Ezekutiva (KE) Bee Timor-Leste, Empreza Públika (BTL, E.P), nune’e iha loron 13 fulan ne’e, ekipa BTL, E.P oferese direta kedas ba Xefe Aldeia Vanaomar, hodi hahú halo melloramentu sistema bee iha sira nia aldeia.
Enkuantu materiál ne’ebé BTL, E.P apoia ba aldeia Vataomar mak popy pipe NOD 40 hamutuk metru 1200 (1200m), simentu saku lima no tanke profil litru 1100 rua.
Fahe ba Sosial Media:
