Díli, 26/03/2024, Prezidente Komisaun Ezekutiva (KE) Bee Timor-Leste, Empreza Públika (BTL, E.P), Eng. Carlos Peloi dos Reis nomos Vise-Prezidente KE BTL, E.P ba Asuntu Boa Governasaun no Fortalesimentu Institusionál, Sra. Elizabeth Amaral, akompaña hosi Diretór Operasasaun no Manutensaun (DOM), Jestór sira no ekipa partisipa iha 7th Progress Meeting kona-bá ‘’Project for Improvement of Water Supply Management of BTL, E.P’’. No 7th Progress Meeting ne’e rasik, realiza iha sala reuniaun, edifísiu sentrál BTL, E.P Caicoli, Díli.
Objetivu hosi 7th progress meeting ne’e, hodi atualiza progresu servisu sira ne’ebé hala’o ona durante ne’e iha setór bee, liuhosi kooperasaun servisu entre BTL, E.P no parseiru JICA. Liu-liu apoiu JICA nian, iha Diresaun O&M, Departamentu Apoiu Kliente no Rekursu Umanu, monitorizasaun ba projetu no progresu projetu, atu nune’e bele hetan resposta ou rekomendasaun balun hosi Ezekutivu BTL, E.P nian nomos planu ba oin.
Iha 7th progress meeting ne’e, iha mos aprezentasaun balun hosi Departamentu Rekursu Umanu, ligadu ho kapasitasaun rekursu umanu liuhosi servisu hamutuk entre BTL, E.P no parseiru JICA, aprezentasaun daruak nian hosi DAK kona-bá verifikasaun dadus kliente BTL, E.P nian, atualizasaun ba koleksaun tarifa bee moos no non-revenue water no aprezentasaun datoluk nian hosi DOM hodi atualiza projetu melloramentu sistema bee moos ne’ebé mak implementa hela iha suku Manleuana, Díli nomos treinamentu internál ba DOM (house training) ne’ebé hetan apoiu hosi parseiru JICA. Aprezentasaun ikus hosi JICA kona-bá persentajen obra fíziku hosi projetu pilotu Manleuana no análize idráuliku (hidráulico) ba projetu refere.
Hafoin aprezentasaun Prezidente Komisaun Ezekutiva BTL, E.P hatete maske atinjimentu servisu ne’ebé la máximu, maibé bazeia ba relatóriu antes ne’e, iha duni impaktu pozitivu ou progresu servisu balun, liuhosi kontribuisaun hot-hotu hosi funsionáriu BTL, E.P nian nomos apoiu hosi parseiru JICA nian. Liu-liu hodi reduz non-revenue water, maske la máximu, maibé ida ne’e parte ou asaun ida ne’ebé bele hadi’a.
Ezekutivu BTL, E.P agradese kle’an ba ekipa JICA ne’ebé sempre hamutuk no apoia ekipa BTL, E.P, agradese ba kontribuisaun hotu-hotu. Ligadu ho parseiru JICA nia misaun ne’ebé besik atu remata, Ezekutivu solisita atu parseiru JICA bele estende tan sira nia ezisténsia, nune’e hodi apoiu ekipa BTL, E.P, atu bele servisu hamutuk hodi dezenvolve di’ak liu tan setór bee iha futuru.
Reuniaun ne’e, partisipa direta hosi JICA Representative ho ekipa nomos parte BTL, E.P rasik.
Fahe ba Sosial Media:
