Díli, 09/01/2025, Prezidente Komisaun Ezekutiva BTL, E.P, Sr. Gustavo da Cruz, Vise-Prezidente KE BTL, E.P ba Asuntu Tékniku, Sr. José Filipe Ximenes Smith, Vise-Prezidente KE BTL, E.P, ba Asuntu Korporativu, Sr. Manuel Tomás Amaral de Carvalho, hamutuk ho Diretór, Jestór/a, Kordenadór no Funsionáriu sira, hodi avalia progresu servisu 2024 no aprezenta planu 2025, ne’ebé realiza iha Salaun CNE.
Objetivu hosi avaliasaun ne’e, aprezenta ba atinjimentu servisu no mos ba dezafiu no obstákulu, ne’ebé durante ne’e emfrenta hela, hodi buka solusaun pozitivu ka hadi’a fallansu sira ne’e ba futuru.
Iha avaliasaun ne’e, Prezidente Komisaun Ezekutiva BTL, E.P hatete, avaliasaun ida ne’e, hala’o ba dala haat ho diferente tebes, iha ezisténsia BTL, E.P, tamba tinan tolu ba kotuk, Diretór, jestór kordenadór no Ofisiál de’it maka partisipa iha aprezentasaun avaliasaun.
“Ha’u fiar katak, ita boot sira laos ema foun ba empreza ida ne’e, imi hatene dezafiu saida mak durante ne’e emfrenta, saida maka ita atu fo solusaun ba ita nia problema bee no saneamentu”.
Iha periodu da huluk, Prezidente KE BTL, E.P, parabeniza ba direjente no funsionáriu sira, tamba hala’o knaar hodi di’ak, ne’ebé rezulta pozitivu, bazeia ba governu fo indikadór importante tolu, konsege ultrapassa espetativa hotu. Atinjimentu servisu ida ne’e, tamba lideransa BTL, E.P sesante ho funsionáriu sira servisu hatudu responsabilidade, ne’ebé indikador importante maka hatudu progresu servisu di’ak, atendimentu públiku no iha kolekta ba reseita. Kada tinan nafatin iha mudansa hodi iha aumentu siknifikativu, liu-liu iha tinan ikus 2024 konsege arekada reseita ultrapassa tarjetu espetativa iha Orsamentu Jeral Estadu no ultrapassa mos tuir planu negósiu ne’ebé maka hakerek ona.
Maske hasoru nafatin dezafiu ba servisu loron ba loron, maibé Prezidente KE BTL, E.P iha esperansa bo’ot sei dezenvolve di’ak liu tan setór bee ida ne’e ba futuru di’ak liu, tamba sei Vise-Prezidente nain rua ho ekipa nia apoia tomak, sei lori susesu ba instituisaun ne’e, ba periodu mandatu tinan haat.
“Ami nain hotu, hetan nomeiasaun polítika ida ne’e, atu lori empreza ida ne’e ba oin, tan ne’e, lakohi rona instituisaun ne’e nia laran, forma grupu ketak-ketak, maibé servisu hamutuk ho amijade, nune’e bele lori bee no saneamentu, hakbesik ba povu iha territóriu laran”.
Lidér Maxímu BTL, E.P kompremitidu iha Mandatu, sei fo kontinuidade ba servisu sira, ne’ebé la’o di’ak ona durante ne’e, ida ne’ebé ladi’ak no ladun di’ak, koko atu hadi’a ba futuru.
Iha biban ne’e, Prezidente BTL, E.P tatoli mos ba funsionáriu sira, kontinua servisu ho professional, iha onestidade no hatudu kapasidade, atu dezenvolve bee no saneamentu ho di’ak, hodi fo benefisiu ba povu tomak.
Iha fatin hanesan, Vise-Prezidente KE BTL, E.P, ba Asuntu Korporativu, Sr. Manuel Tomás Amaral de Carvalho hatete, avaliasaun nia sentidu maka idak-idak atu rekere ba malu, hodi hadi’a setór bee, dezenvolve ho profesionalizmu ba servisu, iha diresaun hirak ne’ebé estabelese iha BTL, E.P.
“Realizasaun ba avaliasaun laos atu foti malu, maibé avalia progresu servisu, ne’ebé maka maluk sira kontribui ona, maibé ita mos hare dezafiu no obstakulu, nune’e mos identifika frakeza no limitasaun, hodi bele hakat ba oin ho di’ak liu”.
Vise-Prezidente KE BTL, E.P, ba Asuntu Korporativu, apresia mos ba ezekutivu sesante, ne’ebé hosik hela obra barak, tan ne’e mandatu ida ne’e sei fo kontinuidade ba oin, tamba Ezekutivu sesante hanesan Fundador no matadalan hodi hatuur padraun lubuk ida, ne’ebé ohin loron ezekutivu ba mandatu daruak, bele hetan konfiansa polítiku liu hosi deliberasaun konsellu ministru, atu mai guia no lao hamutuk ho direjente no funsionariu sira, atu dezenvolve setór importante ida ne’e ba futuru.
“Instituisaun ida ne’e mos papel importante ida, ne’ebé bele konsidera hanesan sai dapur ba Estadu, tamba liu hosi ekipa nia servisu, rekolla reseita ba estadu, hodi kontribui ba orsamentu jerál estadu. Avaliasaun ida ne’e laos hare de’it ba progresu servisu, maibé rekere ba funsionáriu ida-idak ho vontade no prontidaun katak, servisu ho responsabilidade, tamba servisu ba Timor no Timor ita hotu”.
S.E Sekretáriu Estadu Eletrisidade Bee no Saneamentu, Santos Noronha hatete, bee nuudár nesesidade esensiál, tanba seres vivu no setór hotu-hotu iha nasaun ida atu dezenvolve nia xave mak bee, wainhira laiha bee, susar atu halo dezenvolvimentu, tanba ne’e, fatór importante mak bee. Ho nune’e, enkoraja funsionáriu BTL, E.P atu nafatin hala’o knaar, hodi kompleta servisu sira ne’ebé seidauk finaliza iha tinan kotuk no iha tinan ida ne’e, husu atu kontinua servisu hodi kompleta no hadi’a di’ak liu tan.
Iha biban ne’e, S.E SEEAS kongratula Ezekutivu foun BTL, E.P nian no fó apoiu máximu ba sira-nia mandatu nomos fó fiar hodi lori mudansa ba setór bee.
Alen de ne’e, husu ba BTL, E.P atu hadi’a di’ak liu tan liña koordenasaun ne’ebé di’ak ho instituisaun no NGO sira ne’ebé hala’o mos knaar iha setór bee, nune’e labele iha dupla implementasaun ba sistema bee. Nune’e mos, sistema sira ne’ebé implementa ona hosi parseiru sira, atu bele garante nafatin sustentabilidade operasaun no manutensaun nian.
Iha ámbitu avaliasaun ne’e, S.E Ministru Obras Públikas (MOP), Sr. Samuel Marçal enkoraja funsionariu BTL, E.P atu badinas servisu, nune’e povu bele sente prezensa BTL, E.P nian. La’os buat hot-hotu atu realiza iha tinan ida nia laran, maibé bele iha netik mudansa balun no povu hotu bele hetan mos benefísiu hosi servisu BTL, E.P nian.
S.E MOP husu ba hotu-hotu hahú hosi Ezekutviu BTL, E.P, Diretór sira to’o funsionariu, atu servisu makaas liu tan ho vizaun ida, hodi serví povu no nasaun ho di’ak, hanesan serví ita nia-aan rasik.
S.E MOP husu ba Ezekutivu nain tolu atu unidade, tau forsa hamutuk hodi hala’o knaar ho di’ak nomos guia funsionáriu sira hodi halo servisu ho kompromisu ida katak, povu hotu bele sente ukun-aan ida ne’e.
Prezensa iha avalisaun ne’e, Vogál KA nain rua maka hanesan Sr. Valentim da Costa Pinto no Sr. Francisco da Silva, Parseiru JICA, Banku Mundiak, UNICEF no mos partisipante sira seluk.
Fahe ba Sosial Media:
