Díli, 27/03/2023, II Vise-Prezidente Komisaun Ezekutiva (K.E) Bee Timor-Leste, Empreza Públika (BTL, E.P), Sra. Elizabeth Amaral, akompaña hosi ekipa ne’ebé reprezenta BTL, E.P hodi simu Sertifikadu Lisensiamentu Ambientál, ne’ebé atribui hosi Autoridade Nasionál Lisensiamentu Ambientál, Intitutu Públiku (ANLA, I.P), ne’ebé entrega diretamente hosi Sekretáriu Estadu Ambiente (SEA), S.E Sr. Demétrio do Amaral de Carvalho.
Sertifikadu Lisensa Ambientál ne’ebé ANLA, I.P atribui ba BTL, E.P ne’e kona-bá projetu Dili Drainage infrastructure and Upgrading Project, Phase II (Interceptor Channel (Mascarenhas and Villa-Verde), Retension Basins, Rehabilitation and Connnstruction News Drainage Channel). No seremónia atribuisaun sertifikadu ne’e rasik organiza hosi ANLA, I.P, ne’ebé realiza iha edifísiu ANLA, I.P Acait, Díli.
Molok atribui sertifikadu lisensiamentu ambientál ne’e, iha intervensaun, S.E Sekretáriu Estadu Ambiente (SEA), Demétrio do Amaral de Carvalho hatete, Sertifikadu Lisensiamentu Ambientál ne’e, hanesan matadalan ida, hodi jere sira nia projetu ou hanesan padraun hodi utiliza nune’e bele minimiza risku ambientál, wainhira implementa projetu ou investimentu sira iha terrenu.
“Lisensa ambientál ne’e aktu ho nosaun polítika ida, maibé bazeia ba pareser téknika sira, ita haree estudu, impaktu ambientál iha projetu sira iha ita nia rai. Iha projetu lubuk ida ne’ebé wainhira mosu problema ninia reajustamentu ne’e aumenta osan boot. Primeiru tenke haree, ambiente la’os barreira ba dezenvolvimentu, maibé presiza haree didi’ak. Tanba ne’e, ba konsultór no empreza sira, tenke haree prosedimentu ambientál sira, hanesan matadalan ba jestaun iha ita boot sira nia investimentu hamenus risku, tenke haree hanesan estratejia atu garante ita boot sira nia investimentu”, dehan S.E Demétrio do Amaral de Carvalho.
S.E SEA akresenta wainhira falla ou akontese kestaun téknika ruma, durante implementasaun projetu fíziku iha terrenu, konsultór sira mak sei asume risku la’os polítiku sira no konsultór sira mak sei responsabiliza ba justifikasaun tékniku sira. Nune’e, SEA husu ba konsultór sira, atu halo servisu ho prudente no kuidadu, hodi bele garante implementasaun projetu iha nasaun ho di’ak no fornese kondisoens ba dezenvolvimentu, maibé prevene atu labele mosu fuga ba rekursu, tanba ida ne’e prejuízu ba estadu. Tanba Entidade hotu ne’ebé servisu ba estadu dezisaun hirak ne’e, bele kontribui ba fuga rekursu estadu ninian, tanba ne’e, tenke tau matan ou toma atensaun ba prosesu hirak ne’e.
Iha fatin hanesan, Prezidente ANLA, I.P, António Lelo Taci relata, ohin ANLA, I.P atribui sertifikadu lisensiamentu ambientál ho tipu rua, hanesan tipu projetu públiku no privada, hamutuk 44. Hosi númeru ne’e, sertifikadu ba projetu foun ho kategoria A mak DDIUP no setór privadu ida nomos kategoria B no C. Entre sertifikadu lisensiamentu ambientál hirak ne’e, ANLA, I.P atribui mos sertifikadu ne’ebé mak halo renovasaun.
Iha biban ne’e, II Vise-Prezidente Komisaun Ezekutiva (KE) BTL, E.P agradese ba VIII Governu liuhosi SEA/ANLA, I.P tanba ohin bele emite ona sertifikadu lisensiamentu ambientál mai BTL, E.P kona-bá Dili Drainage infrastructure and Upgrading Project Phase II maske liuhosi prosesu lubuk ida, maibé ohin konsege hetan sertifikadu lisensiamentu ambientál ne’e, nune’e bele hafasil prosesu hotu to’o faze implementasaun.
Enkuantu kustu ba Dili Drainage Infrastructure and Upgrading Project Phase II ne’e, ho montante dollar Amerikanu Millaun 142 ($ 142 milloens). No fundus ne’e rasik mai hosi Orsamentu Jerál Estadu (OJE) nomos grant hosi mobilizasaun externa.
Fahe ba Sosial Media:
