Díli, 11/11/2022, Prezidente Komisaun Ezekutiva (K.E) Bee Timor-Leste, Empreza Públika (BTL, E.P), Eng. Carlos Peloi dos Reis, enkontru ho ekipa hosi Autoridade Nasionál Água no Saneamentu, Institutu Públiku (ANAS, I.P), kona-bá “Importánsia Estabelesimentu Lei Rekursu Bee”. Enkontru ne’e, realiza iha Prezidente nia knaar fatin, edifísiu sentrál BTL, E.P, Caicoli.
Objetivu hosi reuniaun téknika entre ANAS, I.P no BTL, E.P ne'e, hodi halo diskusaun ou ko’alia oinsá atu define instrumentu legál bee ne’ebé holístiku atu sai baze legál ba servisu setór bee hot-hotu, tamba BTL, E.P hanesan empreza ne'ebé haree ou responsabiliza kona-bá knaar tomak iha setór bee, nune'e ekipa ANAS, I.P mai halo konsultasaun, hodi rona mos hanoin ou sujestaun no rekomendasaun balun hosi BTL, E.P, molok submete esbosu ne’e ba Ministériu Obras Públika (MOP) hodi aprezenta iha Konsellu Ministru (KM), atu bele hetan aprovasaun ba esbosu refere.
Ofisiál Estratejia no Polítika ANAS, I.P, Juviana Jerónimo hatete, durante iha reuniaun ne’e, Prezidente BTL, E.P apresia tebes ba esbosu Dekretu Lei Jestaun Rekursu Bee refere, tamba esbosu Dekretu Lei ne’e, wainhira hetan aprovasaun, sei apoia tebes BTL, E.P, em termos de hodi bele garante sustentabilidade rekursu bee sira, iha Timor-Leste (TL).
Ezekutivu BTL, E.P ne’e mos hato’o sujestaun no rekomendasaun balun ba ANAS, I.P atu halo mos advokasia ho ministériu relevante sira nomos nível sira ne’ebé foti desizaun inklui parte sosiedade sivil sira, atu bele tau iha konsiderasaun ba esbosu dekretu lei kona-bá jestaun rekursu bee ne’e.
Enkuantu esbosu dekretu lei refere, antes ne’e, iha tinan 2012 submete ona ba KM maibé labele aprova tamba eleisaun parlamentár, nune’e submete fila-fali iha tinan 2019, maibé infelizmente labele hetan aprovasaun, ho razaun reforma institusionál hosi Diresaun Jerál Bee no Saneamentu (DGAS, sigla portugés) ba ANAS, I.P no BTL, E.P, iha tinan 2020. Ho reforma institusionál ne’e, ANAS, I.P halo fila-fali alterasaun ba esbosu refere.
Hafoin iha tinan 2021 ANAS, I.P submete fila-fali esbosu ne’e ba KM no iha tinan fulan jullu tinan 2022 ne’e, atu halo aprezentasaun iha KM maibé la konsege ho razaun rua katak, lei nú. 23/2021 de 10 de fevereiro ne’ebé fó kompeténsia ba autoridade munisipál kona-bá lisensiamentu utilizasaun rekursu bee iha territóriu TL no razaun seluk mak esbosu dekretu lei jestaun rekursu bee ne’e seidauk abranje setór hot-hotu ne’ebé depende ba bee, nune’e esbosu dekretu lei jestaun rekursu bee ne’e, presiza muda ba lei rekursu ídriku, atu nune’e bele sai ba baze legál ba servisu setór bee hotu.
Entretantu daudaun ne’e, esbosu refere iha ona faze finál no ANAS, I.P hala’o hela advokasia ho ministériu relevante sira ne’ebé hala’o sira-nia papel iha setór bee nian, hodi hetan opiniaun ou sujestaun no rekomendasaun, molok aprezenta ba KM.
Share on Social Media:
