Díli, 27/10/2025, S.E Ministru Obras Públikas (MOP), Samuel Marçal hala’o vizita vizita traballu mai Bee Timor-Leste, Empreza Públika (BTL, E.P) nomos bá Project Management Unit Water and Sanitation (PMU WatSan), iha Caicoli.
Vizita ne’e, hodi haree direta servisu ne’ebé fundionáriu BTL, E.P ho PMU WatSan hala’o no kontinua enkontru ho Ezekutivu BTL, E.P no PMU WatSan.
Molok atu hala’o enkontru ho Ezekutivu BTL, E.P nian, S.E MOP vizita uluk ba PMU WatSan no iha biban ne’e, PMU WatSan atualiza mos progresu investimentu iha setór bee nian, liu-liu ba preparativu sira kona-bá atividade lansamentu projetu melloramentu sistema bee, ba iha kapitál munisípiu Lautém no Manufahi nian, ne’ebé sei realiza iha tempu badak. Inklui atualizasaun progresu servisu hosi projetu drenazen D4 nian ba S.E MOP.
Hafoin remata ho PMU WatSan, S.E MOP kontinua hala’o vizita mai BTL, E.P hahú hosi Diresaun Administrasaun no Finansas nia fatin nomos Departamentu Infraestrutura nian, hodi haree funsionáriu sira-nia servisu diária, konversa ho funsionáriu sira nomos enkoraja sira atu nafatin hala’o servisu.
Alen de ne’e, S.E MOP kontinua enkontru ho Prezidente Komisaun Ezekutiva BTL, E.P, Vise-Prezidente KE ba Asuntu Tékniku nomos Vise-Prezidente KE ba Asuntu Korporativu hodi halo avaliasaun ba servisu Ezekutivu nian, fó apresiasaun ba BTL, E.P nia servisu durante ne’e nomos fó orientasaun polítika ba Ezekutivu BTL, E.P atu bele mellora liu tan servisu, hodi fó atendimentu ne’ebé di’ak ba públiku liuhosi iha setór bee no saneamentu.
Durante enkontru ne’e, S.E MOP destake asuntu importante balun, mak atu estabelese ekipa konjunta ida, hodi halo monitorizasaun ba kestaun ligasaun ilegál sira, liu-liu atu kriminaliza ema sira ne’ebé la selu bee nomos halo koneksaun ilegál diretamente ba sistema kanalizasaun bee nian, bazea ba dadus ne’ebé durante ne’e ekipa DAK BTL, E.P rekolla ona.
Iha okaziaun ne’e, S.E MOP orienta mos, servisu balun ne’ebé urjentemente Ezekutivu BTL, E.P tenke halo, mak atu realiza enkontru alargada ida ho Autoridade Munisípiu, Postu-administrativu nomos Lideransa Komunitária suku no aldeia sira, iha kapitál Díli no sei konvida mos ho S.E Primeiru-Ministru (PM) hodi bele ko’alia direta ho Autoridade lokál sira, atu oinsá sira bele fó apoiu ba setór rua, tantu Bee no Eletrisidade nian, liga bee koneksaun ilegál ba bee no ahi inklui kliente sira ne’ebé la kontribui selu tarifa bee no ahi, nune’e bele halo intervensaun direta ba kestaun referidu.
Ohin mos, S.E MOP akompaña hosi Ezekutivu BTL, E.P observa drenazen iha aredór BTL, E.P no MOP nian ne’ebé liga ba kanál D4.
Share on Social Media:
