Aileu, 28/06/2023, Prezidente Komisaun Ezekutiva BTL, E.P, Eng. Carlos Peloi dos Reis, partisipa iha serimónia lansamentu ba estrada liga husi Aileu villa ba Postu Administrativu Lequidoe.
Iha serimónia Lansamentu ba projetu estrada ida ne’e, Ministru Obras Públikas, Eng. Abel Pires da Silva hatete, husu ba Autoridade Munisípiu, Autoridade Lokál no komunidade sira, atu servisu hamutuk ho ministéiu obras públikas no kompañia implementadór ba projetu ida ne’e bele la’o ho di’ak.
Governante ne’e afirma katak, mandatu besik termina ona, maibé prosesu ba dokumentu no tribunal de kontas fo ona vistu, ho prosesu la’o hotu ona, tamba ne’e molok governasaun foun bele hahu ona obra ida ne’e, nune’e ministru obras públikas foun mai bele halo kontinuidade ka tau matan ba projetu hirak, ne’ebé la’o hela terrenu.
Ministru Obras Públikas realsa, ho konstrusaun ba estrada ida ne’e, espera bele fasilita komunidade sira, lori produtu lokál hanesan ai-fuan ba asesu iha merkadu.
Adminitradór Munisípiu Aileu, lori povu Aileu no liu-liu Lequidoe, tamba ho governasaun oitavu governu konstitusionál bele responde ona nesesidade povu Lequidoe, ne’eb’e bele hahu lansa ba estrada ida ne’e.
Autoridade munisípiu ne’e, pronto no kompremitidu atu servisu hamutuk husi parte obras públikas no kompañia implementadór ba projetu ida ne’e, hodi bele garante nafatin projetu ida ne’e labele iha intervensaun ruma husi komunidade.
Orsamentu ba obra ne’e, dollar amerikanu 24,235,453.31, ho distánsia husi Aileu villa ba to’o Lequidoe kuaze kilometru 28, ho durasaun tempu ba projetu ne’e, tinan rua resin hodi bele finaliza obra refere.
Share on Social Media:
