Díli, 14/09/2022, II Vise-Prezidente Komisaun Ezekutiva (K.E) Bee Timor-Leste, Empreza Públika (BTL, E.P), Sra. Elizabeth Amaral ho ekipa hamutuk ho Prezidente ANAS, I.P ho ekipa hala’o enkontru ho Konsultór hosi Água de Portugal (AdP) kona-bá Planu Mestre Water Supply & Sanitation ba munisípiu tolu hanesan, Ainaro, Bobonaro no Covalima. No enkontru ne’e rasik, realiza iha salaun enkontru, ANAS, I.P, Caicoli, Díli.
Objetivu hosi sorumutu ne’e mak Konsultór hosi AdP halo aprezentasaun finál (D6) kona-bá Planu Mestre Water Supply & Sanitation, ne’ebé sei implementa iha munisípiu Ainaro, Bobonaro no Covalima, ba BTL, E.P, ANAS, I.P no partisipante sira seluk, atu nune’e partisipante sira bele fó komentáriu no susjestaun kona-bá aprezentasaun refere, molok hakat ba faze sira tuir mai.
Hafoin aprezentasaun ne’e, entidade sira ne’ebé partisipa iha diskusaun refere, hato’o sira nia perguntas no komentáriu relasiona ho aprezentasaun refere, atu konsultór ne’ebé prepara Planu Mestre ne’e, hodi esplika detalla asuntu balun ne’ebé mak sira kestiona. Alende ne’e, partisipante sira mos hato’o rekomendasaun lubuk ida, atu konsultór presiza haree no hadi’a.
Alende ne’e, hafoin hetan feedback no rekomendasaun balun hosi entidade sira, konsultór AdP simu no rejista ideia hirak ne’e, hodi bele kompleta iha relatóriu finál, nune’e hodi hakat ba dezeñu DED
Entidade sira ne’ebé partisipa iha enkontru ne’e, mai hosi Ministériu Planu no Ordenamentu (MPO), Ajénsia Dezenvolvimentu Nasionál (AND) Autoridade Munisípiu Ainaro, Maliana/Bobonaro, Suai/Covalima, Koordenadór BTL, E.P munisípiu Ainaro, Bobonaro no Diretór SMASA Covalima.
Share on Social Media:
