Díli, 06/09/2022, I Vise-Prezidente Komisaun Ezekutiva (K.E) Bee Timor-Leste, Empreza Públika (BTL, E.P), Sr. Gustavo da Cruz, akompaña hosi Jestór Research, Project & GIS hosi D.E.I hala’o enkontru ho ekipa interministeriál kona-bá Term of Reference (ToR) Planu Mestre ba Bee no Saneamentu ba iha kapitál munisípiu Aileu, Ermera/Gleno, Liquiça, Ainaro, Bobonaro no Covalima/Suai. No reauniaun ne’e realiza iha salaun enkontru edifísiu sentrál BTL, E.P, Caicoli, Díli.
Objetivu hosi enkontru ne’e, hodi diskute kona-bá ToR ne’ebé mak prepara ona hosi konsultór sira hosi Água de Portugal (AdP) no JKC joint venture ho PT Bemako, ba munisípiu neen. No ekipa sira mos hodi diskute kle’an ou haree hamutuk oinsá bele mantein ou retira/hasai servisu balun relasiona ho Social Safe Guard no Enviromental nian ba COWI, bazeia ba estudu ou análize hosi GAP ne’ebé mak sira hala’o ona, iha munisípiu neen ne’e, molok hakat ba faze Detailed Engeneering Design (DED).
Durante iha diskusaun ne’e, ekipa tékniku/enjeñeiru sira hosi interministeriál hato’o sira nia komentáriu no sujestaun ou ideia ne’ebé mak konsultór sira presiza hadi’a iha ToR Planu Mestre nian, nune’e molok hakat ba faze DED, nune’e hodi garante kualidade projetu iha future.
Atu termina, Ezekutivu BTL, E.P apresia no aseita ho ideia sira hosi ekipa sira no konsidera enkontru ne’e iha rezultadu pozitivu, tamba partisipante sira fó ideia ne’ebé di’ak, hodi labele fó impaktu ba projetu hirak ne’e.
Ekipa interministeriál sira ne’ebé partisipa iha diskusaun ne’e, hanesan Autoridade Nasionál Bee no Saneamentu, Institutu Públiku (ANAS, I.P, sigla portugés), Ajénsia Dezenvolvimentu Nasionál (AND), Diresaun Nasionál Ordenamentu Espasiál- Ministériu Planeamentu no Ordenamentu (DNOE-MPO) nomos tékniku BTL, E.P rasik.
Share on Social Media:
