Covalima, 09/09/2022, Ekipa Tékniku ou Enjeñeiru hosi Diresaun Enjeñaria no Investimentu (D.E.I) Bee Timor-Leste, Empreza Públika (BTL, E.P), akompaña hosi Tékniku Operadór munisípiu Covalima, Pesoál Apoiu Kliente, xefe suku Zulo no Xefe Seksaun Dezenvolvimentu Komunitáriu postu-administrativu Zumalai, lori kompañia lokál sira ne'ebé mak partisipa iha prosesu tenderizasaun, ba projetu Konstrusaun Fornesimentu Sistema Bee Moos no Fornesimentu Instalasaun Tanke Rezervatóriu Bee Moos, ba site visit, iha postu-administrativu Zumalai Villa, munisípiu Covalima.
Atividade Site Visit ne’e, hala’o durante loron rua, hahú hosi loron 08 to’o 09 fulan setembru tinan 2022 ne’e ho objetivu mak ekipa D.E.I BTL, E.P lori kompañia sira ne'ebé partisipa iha prosesu tenderizasaun ne'e no kompañia sira hamutuk 22, fahe ba pakote rua, direitamente ba terenu hodi hatudu fatin bee matan no esplika dezeñu ne'ebé atu harii Tanke Rezervatóriu Bee, Tanke BPT, no mós hatudu fatin, atu dada liña transmisaun no liña distribuisaun bee nian.
Enkuantu tanke rezervatóriu bee moos hirak ne’e, ho nia kapasidade metru kúbiku 180 iha unidade ida (180m3_1 unidade), tanke rezervatóriu ho metru kúbliku 100 iha unidade 4 (100m3_4 unidades) no tanke ho medida metru kúbliku 60, iha unidade ida (60m3_1 unidade), tanke hirak ne’e sei instala iha fatin ne’ebé tékniku sira identifika ona.
Molok tun ba terrenu, ekipa D.E.I BTL, E.P ne'ebé mak reprezenta hosi Vocal Point, Zeferino Soares Lopes hala'o uluk enkontru, hodi koordena ho autoridade lokál sira, kona-bá fatin hirak ne'ebé sei implementa projetu no planu servisu ba futuru.
Durante iha enkontru ne'e, Administradór postu-administrativu Zumalai apresia tebes ho programa BTL, E.P nian ba projetu bee moos refere no sira prontu atu koopera iha prosesu tomak ba implementasaun projetu refere, tuir dezeñu no BoQ ne'ebe mak tékniku BTL, E.P nian prepara ona.
Administradór ne’e mós husu ba kompañia sira ne’ebé mak konkore ba tenderizasaun refere, tenke servisu ho fuan no labele haree uluk ba osan.
Entretantu projetu Konstrusaun Fornesimentu Sistema Bee Moos no Instalasaun Tanke Rezervatóriu Bee Moos ne’e, sei benefisia ba komunidade iha suku tolu, hanesan suku Lour, Fatuleto no Zulo, iha postu-administrativu Zumalai, munisípiu Covalima.
Share on Social Media:
