Díli, 15/01/2025. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Tékniku, Sr. José Filipe Ximenes Smith akompaña hosi Diretór Operasaun no Manutensaun (DOM) ho ekipa nomos Xefe aldeia La’o Rai, tun ba terrenu hodi observa direta koneksaun ilegál sira iha aldeia La’o Rai, suku Culuhun, postu-administrativu Cristo Rei, Díli.
Durante observasaun iha terrenu, Vise-Prezidente KE BTL, E.P ba Asuntu Tékniku ho Diretór O&M identifika, iha kliente balun sobu metru kontadór hodi liga direta ba sistema kanalizasaun no iha balun uza bomba elétrika hodi liga ba sistema kanalizasaun. Maske BTL, E.P informa on aba kliente sira, tantu dirtea no indireta ou liuhosi meius komunikasaun sira, maibé kliente sira nafatin kontra hodi kontinua halo koneksaun ilegál.
Hafoin observasaun, Ezekutivu BTL, E.P no Diretór O&M husu ba Xefe aldeia La’o Rai, atu kontrola nia abitante sira ne’ebé sobu metru kontadór no halo ligasaun ilegál, nune’e labele komete tan aktu refere. No Xefe aldeia La’o Rai prontu servisu hamutuk ho BTL, E.P no liderasan aldeia ne’e mos sei kontrola no partilla informasaun ba kliente sira, atu nune’e siora bele evita hahalok ne’e.
Relembra mos katak, ligasaun ilegál direta ba sistema kanalizasaun bee no sobu metru kontadór ou halo aat metru kontadór ne’e, kontra regulamentu BTL, E.P nian, ne’ebé sita iha Dekretu Lei nú. 4/2004, artigu 14, nune’e sei hetan multa ho presu ne’ebé sita ona iha Dekretu Lei refere. Nune’e mos, uza bomba elétrika hodi liga direta ba kanalizasaun públika nian abrigu iha Dekretu Lei nú.4/2004, artigu 14 no 27.
Alen de ne’e, aktu koneksaun ilegál ne’e kontribui mos hamenus presaun bee, nune’e afeta direta ba kliente sira ne’ebé asesu bee tuir sistema normál.
Tanba ne’e, BTL, E.P nafatin husu ba kliente sira ne’ebé asesu ona sistema kanalizasaun bee hosi BTL, E.P, atu kuida sistema sira no labele sobu ka halo estraga inklui labele halo koneksaun ilegál direta ba sistema kanalizasaun nian, wainhira bee la sai ou bee sai ho volume kiik, kliente sira tenke hato’o keixa ba tékniku operadór ne’ebé destaka ona iha zona ida-idak ou bele hakat direta ba balkaun no edifísiu BTL, E.P nian iha Caicoli, nune’e bele tékniku sira bele bá haree no halo intervensaun.
Nune’e mos, iha tempu besik ekipa DAK ho tékniku sira distribui mos karta notifikasaun ba kliente sira ne’ebé la kumpri regras, hodi fó tempu ba sira durante loron 10, atu bele selu multa, bazeia aktu ne’ebé sira komete.
Share on Social Media:
.jpeg)
