Díli, 31/03/2023, Diretór hosi Diresaun Operasionál no Manutensaun (DOM) BTL, E.P, Sr. Aleixo dos Santos hatete O&M iha área rurál importante tebes, hodi haree kona-bá sistema bee sira ne’ebé eziste iha fatin sira ne’e, tanba ne’e, BTL, E.P prontu servisu hamutuk ho SMASA hodi lori bee hakbesik ba populasaun sira iha área rurál. Maibé BTL, E.P mos iha responsabilidade oinsá atu mellora sistema bee urbana nian, hodi hatama reseita ba kofre estadu, ho nune’e BTL, E.P iha munisípiu sira prontu servisu hamutuk ho SMASA, PNDS atu bele kanaliza bee ba komunidade. Diretór DOM hato’o asuntu ne’e, hafoin partisipa iha seremónia enseramentu ba atividade (Traning of Trainer-ToT) ou treinamentu ba Diretór SMASA sira hosi munisípiu 13, tuir Planu Asaun Komunidade (PAK), iha salaun João Paulo II, Comoro, Díli.
Iha biban ne’e mos, Diretór DOM BTL, E.P husu ba pesoál SMASA ne’ebé tuir treinamentu ne’e, atu fahe mos sira nia esperiénsia ne’ebé sira hetan iha treinamentu ba ekipa Grupu Maneja Fasilidade (GMF) iha ida-idak nia munisípiu.
Atividade treinamentu ne'e ho objetivu hodi prepara pesoál sira ne'e, atu sira prontu no bem preparadu hodi halo operasaun no manutensaun ba sistema bee rurál sira iha territóriu nasionál.
Durante iha treinamentu ne’e, ko’alia mos kona-bá lei nú. 4/2004 ne’ebe BTL, E.P no SMASA mos uza, nune’e ANAS, I.P presiza haree ba asuntu ne’e.
Iha fatin hanesan, Diretór-Jerál Desentralizasaun Administrativa hosi Ministériu Administrasaun Estatál (MAE) husu Diretór SMASA sira katak bukae ne’ebé sira hetan durante iha formasaun ne’e, hodi partilla fila-fali ba ema seluk ne’ebé seidauk hetan. Diretór-Jerál ne’e hatutan, presiza mos kria liña koordenasaun ne’ebé di’ak tuir planu estratéjiku MAE nian ne’ebé iha prinsípiu ida sita kona-bá koordenasaun, integrasaun sinkronizasaun no simplifikasaun.
Alende ne’e, Diretór-Jerál ne’e mos husu ba Diretór SMASA no BTL, E.P atu soe hahalok egoísta departamentál no sientista nian, nune’e atu koopera ou la’o hamutuk sai ida de’it, oinsá maka atu lori dezenvolvimentu ba oin liu-liu iha setór bee, diferensa opiniaun ne’e normál, maibé wainhira atu alkansa objetivu difinidu ida, tenke mínimu hamenus no máximu halakon diferensa opinaun sira ne’e, nune’e servisu hamutuk hodi atinji objetivu ida lori bee moos besik ba populasaun sira.
Ezisténsia BTL hanesan Empreza Públika (BTL, E.P) ho nia estatutu ida ne'ebé hatuur klaru katak hodi rekolla reseitas, atu kontribui ba dezenvolvimentu nasaun nian. Tanba ne'e, SMASA labele entende sala katak, ezisténsia BTL, E.P atu hadau knaar SMASA nian.
Molok ensera, iha biban ne'e, fahe mos sertifikadu ba formandu sira ne'ebé durante loron lima tuir treinamentu.
Treinamentu ne’e, organiza hosi ANAS, I.P durante loron lima no hetan apoiu mos hosi parseiru PARTISPA, hola parte mos hosi PNDS, BTL, E.P rasik nomos SMASA.
Share on Social Media:
