Bobonaro, 12/10/2023, Ekipa Bee Timor-Leste, Empreza Públika (BTL, E.P) Nasionál ne'ebé kompostu hosi Diretór Operasaun no Manutensaun (DOM), Jestór hosi Departamentu Apoiu Kliente no Departamentu jurídiku BTL, E.P no akompaña mos hosi BTL, E.P munisípiu Bobonaro, disemina informasaun kona-bá Dekretu Lei no Diploma Ministeriál BTL, E.P nian, ba komunidade sira, iha postu-administrativu Cailaco, munisípiu Bobonaro.
Ekipa BTL, E.P disemina informasaun kona-bá Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku”, nune’e mos Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária” no ikus liu Diploma Ministeriál nú. 1/2009 loron 5 fulan Outubru, kona-bá “Fiskalizasaun Sistema Abastesimentu Bee”.
Diretór Operasasaun no Manutensaun (DOM), Aleixo dos Santos hatete, objetivu hosi sosializasaun ne'e, hodi partilla informasaun kona-bá regulamentu hotu ba komunidade sira, atu sira bele hatene regras, nune’e sira labele viola dekretu lei no diploma ministerial ne’ebé mak eziste ona no sita kona-bá proibisaun halo koneksaun bee ho ilegalmente ba sistema sira nomos oinsá atu bele selu tarifa bee moos nian.
Iha biban ne'e, esplika mos kona-bá parte O&M nia servisu sira, kona-bá atendimentu públiku ba operasaun no fornesimentu bee moos inklui halo manutensaun ba sistema bee nian.
Enkuantu projetu sistema bee moos iha postu administrativu Cailaco nian, remata no inaugura ona, daudaun ne’e abitante sira asesu ona sistema bee moos refere. Alende ne’e, konsumidór sira sei asesu ho gratuíta durante fulan tolu, maibé liu tiha tempu ne’ebé determina (fulan tolu) ne’e, konsumidór sira sei hahú selu tarifa bee moos, tuir gastu bee lor-loron nian. tanba ne'e, liuhosi informasaun ne'ebé BTL, E.P hato'o ne'e, bele tulun konsumidór sira hodi kompreende, wainhira to'o tempu atu selu tarifa bee nian, kliente sira bele koopera no kumpri sira nia dever.
Reprezentante Prezidente Autoridade Munisípiu Bobonaro hatete, diseminasaun ida ne'e importante tebes, nune'e komunidade bele entende didi'ak, hodi kuida fasilidade ne'ebé BTL, E.P instala ona iha Cailaco. Tanba investimentu sistema bee moos ida ne'e ba povu Cailaco, tanba ne'e, ba populasaun Cailaco ne'ebé sai na'in ou benefiariu hosi bee ida ne'e, iha responsabilidade atu asegura sistema bee refere, nune'e bele dura to'o tempu naruk.
Iha biban ne'e, Reprezentante Prezidente Autoridade ne’e husu ba abitante sira, tenke asegura bee matan, liuhosi kuda aihoris besik iha bee matan, labele tesi ai no sunu rai arbiru no evita halo toos besik ba bee matan.
Alende ne'e, hafoin rona tiha esplikasaun hosi BTL, E.P no Autoridade Lokál sira, konsumidór sira hato’o mos sira nia apresiasaun no rekomendasaun balun ba BTL, E.P tenke jere sistema bee ho di'ak, katak distribuisaun bee tenke oras 24 nia laran, tenke loke bee tuir oras no labele tarde, nune’e konsumidór sira bele sente satisfeitu, hodi bele konstribui reseitas, liuhosi selu tarifa bee moos nian.
Tuir planu, atividade diseminasaun ne’e, sei kontinua ba postu-administrativu sira seluk, hodi partilla mos informasaun ne'ebé hanesan ba komunidade sira seluk.
Partisipa iha ativisdade diseminasaun ne’e mak Administradór postu-administrativu Cailaco, Lideransa suku no aldeia, parte seguransa PNTL Eskuadra Pontu Cailaco nomos abitante Cailaco.
Share on Social Media:
