Díli, 23/01/2024. Vise-Prezidente Komisaun Ezekutiva Bee Timor-Leste, Empreza Públika (BTL, E.P) ba Asuntu Sistema Bee, Saneamentu no Drenajen, Sr. Gustavo da Cruz enkontru ho ekipa hosi Autoridade Protesaun Sivil Timor-Leste (APC, sigla portugés), iha Vise-Prezidente nia knaar fatin, Caicoli, Díli.
Objetivu hosi reuniaun ne’e, hodi halo koordenasaun no hetan informasaun tékniku balun kona-bá rekursu BTL, E.P nian, atu nune’e, iha futuru wainhira akontese dezastre ou iha situasaun emerjénsia ruma iha kapitál Díli, bele apoia APC hodi halo mitigasaun.
Relativamente ba konfirmasaun rekursu BTL, E.P nian ne’e, mak Vise-Prezidente KE BTL, E.P relata katak, BTL, E.P iha estasaun bomba bee 26, hosi númeru ne’e, iha estasaun bomba tolu hanesan iha Culuhun, Comoro no Caicoli mak bele enxe bee ba kareta tanke, estasaun seluk hodi fornese bee ba konsumidór sira. Enkuantu hosi estasaun bomba tolu ne’ebé mensiona iha leten, rua bele uza ba konsumu no ida utiliza ba fase sasan de’it. BTL, E.P mos asegura hela mobile tank no mobile latrinas ne’ebé mak entrega hosi parseiru sira, hafoin utiliza ba situasaun kalamidade ou inundasaun 4 de abril no covid-19 nian, tanba ne’e, wainhira iha situasaun emerjénsia ruma bele utiliza fila-fali. Alende ne’e, BTL, E.P iha mos kareta tanke bee nian nomos kareta tanke hodi xupa sentina nian.
Ezekutivu ne’e informa mos katak, BTL hanesan empreza públika, tanba ne’e, iha atividade sosiál balun mak BTL, E.P halo, maibé la signifika katak servisu hotu-hotu sosiál. Iha servisu balun ne’ebé BTL, E.P bele apoia, maibé iha sorin seluk BTL, E.P mos presiza hetan reseitas hosi servisu hirak ne’e.
Iha biban ne’e, Adjuntu Operasionál APC, Mariano A. Lopes esplika mos kona-bá dezastre hirak ne’ebé APC define ona, tuir nível, hanesan nível 1, 2 no 3, nune’e nível balun mak presiza apoiu no balun APC rasik bele halo intervensaun. Hanesan dezastre ho nível 1, APC bele halo intervensaun mesak, sem apoia hosi stakeholder/parseiru sira, maibé dezastre ne’ebé mak akontese to’o ona iha nível 2 no 3 mak APC sei presiza apoiu hosi parseiru sira. Tanba ne’e, prezensa APC nian, hodi hetan informasaun ou halo konfirmasaun kona-bá rekursu ne’ebé BTL, E.P iha, atu nune’e, iha futuru wainhira iha situasaun emerjénsia ou akontese dezastre naturál ruma, bele servisu hamutuk hodi apoia halo mitigasaun.
Share on Social Media:
