𝐃𝐢́𝐥𝐢, 𝐓𝐞𝐫𝐬𝐚-𝐟𝐞𝐢𝐫𝐚 𝟎𝟗 𝐉𝐮𝐧̃𝐮 𝟐𝟎𝟐𝟔.
Ofisiál Jurídiku BTL, E.P, Zefrino Gusmão Rangel ho tékniku DAK hamutuk ho Lideransa suku Manleuana no aldeia Lecibutak nomos OPS rezolve kazu koneksaun ilegál, atrazu selu tarifa durante tinan rua nomos estraga liña kanalizasaun bee iha aldeia Lecibutak, suku Manleuana, Postu-administrativu Dom Aleixo, Díli.
Molok atu hasoru kliente ne’ebé estraga fasilidade bee ne’e, ekipa BTL, E.P hala’o uluk enkontru ho Xefe suku Manleuana, Xefe aldeia Lecibutak, OPS Manaleuana no Lia na’in, hodi introduz prezensa BTL, E.P nian iha suku ne’e no partilla mos regulamentu sira.
Ho nune’e, parte BTL, E.P husu ba lideransa suku atu apoia BTL, E.P, hodi tau matan ba fasilidade bee ne’ebé mak BTL, E.P instala ona iha aldeia sira,l ne'ebé perténsia ba suku Manleuana nian, atu nune’e bele fó biban ba BTL, E.P hodi mellora no espande sistema kanalizasaun bee ba aldeia no suku sira seluk ne’ebé seidauk asesu ba bee moos.
Iha okaziaun ne’e, Xefe suku Manleuana husu ba BTL, E.P atu halo xamada no aplika multa ba komunidade sira ne’ebé identifikadu estraga fasilidade bee, wainhira sira la kumpri tenke prosesa tuir dalan legál.
Hafoin remata enkontru ho Lideransa Komunitária sira, ekipa BTL, E.P ho Xefe aldeia Lecibutak kontinua halo aproximasaun ho sidadaun ne’ebé halo koneksaun ilegál no estraga fasilidade bee, iha sede suku Manleuana.
No sidadaun ne’e rekoñese sira-nia aktu ne’ebé sira komete katak, sira halo dunik koneksaun ilegál, atraza selu tarifa bee no estraga kanu kanalizasaun bee ne’ebé instala besik iha sira-nia hela fatin, iha aldeia Lecibutak, suku Manleuana, hodi rezulta bee sulin estraga iha fatin ne’e, nune’e afeta direta distribuisaun bee moos ba konsumidór sira seluk.
Ho aktu ne’e, BTL, E.P notifika ona kliente refere no ohin sira halo ona konfirmsaun ho parte DAK kona-bá kustu koima no atraza selu tarifa nian, nune’e iha tempu besik, kliente ne’e sei fila-fali ba balkaun, hodi halo pagamentu ba multa ne’ebé BTL, E.P aplika nomos atrazu sira.
Ho nune’e, hafoin remata iha sede suku Manleuana, Ofisiál Jurídiku BTL, E.P ho tékniku DAK hamutuk ho Xefe aldeia Lecibutak no OPS inklui abitante ne’ebé estraga fasilidade bee ne’e, kontinua tun ba terrenu hodi observa direta kanu estragadu ne’ebé lokaliza iha aldeia Lecibutak, nune’e tékniku DAK nian, hahú hadi’a kedas kanu ne’e.
Share on Social Media:
