๐๐ขฬ๐ฅ๐ข, ๐๐ ๐๐๐ง๐๐ข๐ซ๐ฎ ๐๐๐๐. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Tékniku, José Filipe Ximenes Smith, akompaña hosi Jestór O&M, observa direta poly distribuisaun bee ne’ebé ahi han estraga/ku’ak, iha área Becora, Postu-administrativu Cristo Rei.
Hafoin observasaun, Ezekutivu BTL, E.P fó kedas orientasaun ba Jestór O&M, atu orienta tékniku sira hodi halo intervensaun imediatu ba liña distribuisaun refere, nune’e labele perturba abastesimentu bee moos ba konsumidór sira.
Rekorda mos katak, liña distribuisaun ne’e, foin instala foun, hodi kanaliza bee hosi tanke rezervatóriu Culau nian no atu fornese ba konsumidór sira, maibé ohin dader, loron 14 janeiru 2026, identifika ahi han ku’ak/kotu iha estrada públiku área Becora nian no deskonfia hetan sunu hosi ema deskoñesidu, hodi rezulta bee sulin estraga fatin ne’e.
Maske BTL, E.P esforsu atu halo melloramentu ba sistema kanalizasaun, hodi bele fornese bee ba komunidade sira, maibé iha ema balun ne’ebé seidauk iha konsiénsia, nafatin estraga fasilidade bee, ne’ebé instala ona, iha sira-nia aldeia no suku, ne’ebé ikus mai, afeta ba konsumidór sira labele atu asesu bee tuir oráriu ne’ebé estabelese ona.
Ho estragu refere, oras ne’e dadaun, sei taka provizória bee no labele distribui bee moos ba konsumidór sira, ne’ebé durante ne’e asesu bee hosi tanke rezervatóriu Culau, nune’e bele fó espasu ba tékniku sira atu hadi’a kanu ne’e.
Tanba ne’e, liuhosi meius ida ne’e, BTL, E.P nafatin informa ba públiku, atu labele estraga fasilidade bee no husu mos ba komunidade sira atu tau matan ou kuida sistema kanalizasaun bee hirak ne’ebé mak instala ona, iha bairo ida-idak, aldeia, suku, postu no munisípiu sira.
Relativamente ba estragu ne’e, BTL, E.P mos sei hato’o nota kooperasaun ba Autoridade lokál sira, atu nune’e bele haree no toma atensaun ba hahalok abitante balun ne’ebé estraga fasilidade públika, liu-liu sistema kanalizasaun bee ne’e.
Share on Social Media:
