Lautém, 21/03/2025, Vise-Prezidende Komisaun Ezekutiva, Bee Timor-Leste, Empreza Públika, ba Asuntu Tékniku, Sr. José Filipe Ximenes Smith, Vise-Prezidente Komisaun Ezekutiva, Bee Timor-Leste, Empreza Públika, na Asuntu Korporativu, Sr. Manuel Tomás Amaral de Carvalho, akompaña Jestór Infraestrutura BTL, E.P, Engiñeiru, funsionáriu destakadu BTL, E.P munisípiu Lautém no Supervaizor ba projetu ne’e, hamutuk ho Administradór Postu Administrativu Luro, monitoriza projetu konstrusaun sistema fornesimentu bee moos, ne’eb’e lokaliza iha Postu Administrativu Luro.
Iha monitorizasaun ne’e, Komisaun Ezekutiva BTL, E.P observa katak, kompañia implementadór servisu nia obra fizíku atinji ona 75%, maibé installasaun ba kanu transmisaun no distribuisaun balun la tuir BoQ, ne’eb’e BTL, E.P atribui ba kompañia atu halo tuir hanesan kanu lolos hakohi maibé kompañia la hakohi no la tau rai henek, nune’e mos iha tanke BBT sira mos lolos tau plastiku maka foin tau fatuk krikil, maibé kompañia la kumpri orientasaun ne’e.
Ho prejensa komisaun ezekutivu ne’e, konsege identifika problema balun, ne’ebé maka kompañia la kumpri nia dever lolos, tan ne’e, Ezekutivu BTL, E.P orienta kompañia implementadór atu hadi’a hikar erru ida ne’e no kontinua aselera prosesu konstrusaun projetu ida ne’e, hodi finaliza ona, nune’e populasaun sira bele asesu bee ho regular.
“Ho projetu fizíku atinji 75% ne’e, komunidade sira iha uma kain balun, hahu asesu dadaun ona kanalizasaun bee moos hanesan torneira públika no mos installasaun metru kontadór, populasaun sira senti kontente ho kanalizasaun bee moos ida ne’e, besik los uma sorin no la la’o dook tan maka foin kuru bee, maibé agradese tebes ba BTL, E.P, tamba bele hakmaan ona ami nia sofrementu durante tinan barak nia laran, susar atu asesu bee moos, maibé ohin loron gras aida, bee bele iha uma sorin, ami asesu hodi utiliza bee ba nesesidade loron-loron”.
Share on Social Media:
