Díli, 23/09/2025. Prezidente Komisaun Ezekutiva (KE) Bee Timor-Leste, Empreza Públika (BTL, E.P), Sr. Gustavo da Cruz simu vizita kortejia hosi parseiru Grupu Banku Mundiál no kontinua hala’o enkontru ho Reprezentante Rezidente Grupu Banku Mundiál nian iha Timor-Leste (TL), Sr. David Freedman, iha Prezidente nia knaar fatin, BTL, E.P, Caicoli.
Reuniaun ne’e, Reprezentante Rezidente Grupu Banku Mundiál nian iha TL, mai kumprimenta nune’e mos lideransa nain rua introduz-aan ba malu, tanba BTL, E.P nudár parseiru hosi Grupu Banku Mundiál nian.
Iha biban ne’e, Ezekutivu BTL, E.P no Reprezentante Rezidente Grupu Banku Mundiál nian iha TL halo diskusaun lubuk ida, kona-bá progresu BTL, E.P nian, liga ba investimentu menór sira ne’ebé implementa ona iha kapitál Postu-administrativu sira no preparasaun ba iha kapitál munisípiu sira nomos haree kona-bá saida mak Grupu Banku Mundiál bele fó apoiu, inklui deskute mos asuntu balun ne’ebé pendente hela.
Prezidente KE BTL, E.P informa mos ezisténsia BTL, E.P nian no esforsu ne’ebé BTL, E.P halo ona durante tinan lima. Nune’e Reprezentante Rezidente Grupu Banku Mundiál nian iha TL apresia tebes ba avansu ne’ebé BTL, E.P halo ona durante periudu ida ho balun.
Antes ne’e, Reprezentante Rezidente Grupu Banku Mundiál nian iha TL, Sr. David Freedman hala’o ona vizita ba Munisípiu no Postu-Administrativu balun no observa direta investimentu BTL, E.P nian, iha Postu balun, nune’e Lideransa Grupu Banku Mundiál nian iha TL ne’e sente kontente no hato’o apresiasaun ba BTL, E.P nia esforsu hirak ne’e.
Iha okaziaun ne’e, Lideransa Grupu Banku Mundiál nian iha TL pronunsia mos katak, iha fulan outubru, misaun ida hosi Grupu Banku Mundiál nian sei mai TL, nune’e solisita ba Ezekutivu BTL, E.P nian, atu konserva hela tempu no halo preparativu sira, nune’e hodi bele halo diskusaun téknika ne’ebé di’ak ho misaun ne’ebé sei mai iha fulan oin.
Share on Social Media:
