Díli, 10/08/2022, Prezidente Komisaun Ezekutiva BTL, E.P, Eng. Carlos Peloi dos Reis, akompaña hosi Diretór Diresaun Enjeñaria no Investimentu (D.E.I) no Programa Jerensiamentu Unidade (PMU, sigla inglés) BTL, E.P, hala’o enkontru ho reprezentante hosi Banku Mundiál, ne’ebé hala’o mak servisu kona-bá Water Supply Project ba munisípiu Baucau no Díli nian, iha Prezidente nia knaar fatin, edifísiu sentrál BTL, E.P, Caicoli.
Objetivu husi enkontru ne’e, hodi atualiza no diskute kona-bá prosesu tomak ba Water Supply Project ba munisípiu Baucau no Díli nomos fundus hodi finansia projetu refere.
Durante iha enkontru ne’e, parte rua (BTL, E.P ho Banku Mundiál) diskute kona-bá Water Supply Project ba Baucau no Díli nian, ne’ebé to’o ohin loron seidauk implementa, nomos kona-bá mudansa orsamentu, tamba valór fundus iha akordu diferente ho valór ne’ebé eziste iha dezeñu nian.
Relasiona ho kestaun ne’e, Prezidente K.E BTL, E.P hatete projetu refere seidauk bele implementa, tamba daudaun ne’e, sei iha hela prosesu Dezeñu Detallada (Detailed Engineering Design-DED) no balun prosesu DED finaliza ona, maibé sei kontinua ba faze tuir mai, molok tama faze implementasaun.
Ezekutivu ne’e esplika, prosesu DED kona-bá Water Supply Project ba munisípiu Baucau nian remata ona no entrega ona mai BTL, E.P, daudaun ne’e BTL, E.P sei prepara hela karta aprezentasaun hodi lori ba Ajénsia Dezenvolvimentu Nasionál (AND) atu halo verifikasaun, hafoin verifikasaun sei kontinua fali ba faze seluk hanesan ba aprezenta iha Konsellu Administrasaun Fundu Infraestrutura (KAFI) no faze aprovizionamentu nomos faze sira seluk, molok implementa projetu refere. Enkuantu Water Supply Project ba Díli nian, daudaun ne’e sei iha prosesu DED no tuir planu prosesu ne’e sei finaliza iha fulan ne’e nia laran, hodi kontinua ba faze sira seluk.
Entretantu prosesu DED kona-bá Water Supply Project ba munisípiu Baucau nian, responsabiliza ou hala’o hosi konsultór hosi Água de Portugal-AdP no kapitál Díli nian mak responsabiliza hosi konsultór Dongsung hosi Corea.
Share on Social Media:
