Díli, 11/10/2022, Prezidente Komisaun Ezekutiva (K.E) Bee Timor-Leste, Empreza Públika (BTL, E.P), Eng. Carlos Peloi dos Reis akompaña hosi Diretór Diresaun Enjeñaria no Investimentu (D.E.I) hala'o enkontru koordenasaun servisu ho liña ministerál sira, hanesan Prezidénsia Konsellu Ministru (PCM, sigla portugés), Ministériu Administrasaun Estatál (MAE), Ministériu Obras Públikas (MOP), Sekretaria Estadu Terras no Propriedades (SETP), Compact Development Team Timor-Leste (CDT-TL) no Autoridade Nasionál Lisensiamentu Ambientál, Institutu Públiku (ANLA, I.P), iha Hotel Novo Turismo, Díli. Reuniaun ne’e rasik lidera hosi Ministru PCM, S.E Fidelis Leite Magalhães.
Objetivu hosi enkontru ne’e mak atu BTL, E.P bele hato’o komponente sira ba implementasaun projetu ne’ebé finansia hosi Millennium Challenge Corporation (MCC) nomos vizaun jerál kona-bá projetu ne’e no medidas saida mak bele foti iha tempu badak nia laran, molok implementasaun projetu refere.
Iha abertura Ministru PCM hatete, hafoin PN ratifika akordu entre Governu TL no MCC hosi (EUA) iha tempu badak parte PCM sei asina Project Implementation Agreement (PIA) ho parte MCC nian, hodi kontinua ba faze sira tuir mai, maibé presiza kompleta rekezitu ne’ebé mak iha, nune’e wainhira projetu refere implementa labele iha impedimentu ruma.
“Akordu ratifikadu no ita hato’o ona ba Amerikanu (MCC) sira, no sira laiha problema kona-bá ida ne’. maibé depois de ida ne’e nia laran, buat ne’ebé ha’u rasik tenke halo mak asina Project Implementation Agreement-PIAho parte MCC nian. PIA ne’e mak iha ninia konteúdu ba projetu ne’ebé liga ho finansiamentu hosi MCC maibé ligadu mos ho liña ministeriál sira-nia knaar rasik, entaun ida ne’e mak importante tebes mai ita atu hatene liu-liu S.E Ministru Administasaun Estatál, Sekretáriu Estadu Terras no Propriedade no hosi parte MOP, tamba depois de asina ita asina tiha PIA, ita hahú ona kontajen de tempu, la kleur ita sei ho periodu tinan lima, tamba ne’e servisu preliminár sira tenke halo hotu. Atu ita hakarak projetu sira ne’e sei avansa sei laiha impedimentu sira, mak iha reuniaun ida ne’e hanesan reuniaun dahuluk hodi esplika no deskute importante liu mak ministériu sira apar no sei tama ba faze implementasaun hodi hatene katak dezafiu sira nia solusaun mak saida”, dehan Ministru PCM.
Perante iha reuniaun ne’e, Prezidente K.E BTL, E.P aprezenta ou esplika mos kona-bá komponente bee nian no espetativa saida mak iha, liuhosi ministériu relevante sira no ministériu sira seluk atu bele haree, oinsá atu bele rezolve rekezitu hirak ne’ebé sei iha, atu nune’e implementa projetu refere bele la’o ho di’ak. Ezemplu kona-bá konfirmasaun sira ne’ebé dalaruma MCC sei presiza, hanesan tratamentu lixu sólidu nian, tamba projetu ne’ebé sei implementa ne’e, sei involve mos tratamentu lixu líkidu.
Hafoin esplikasaun hosi Ezekutivu BTL, E.P, entidade sira hosi ministériu relevante hato’o preokupasaun balun, komentáriu no fó mos rekomendasaun atu parte BTL, E.P presiza kompleta dokumentu balun nomos presiza halo diskusaun mos ho ministériu relevante sira kona-bá parte téknika nian nune’e bele kompleta rekezitu sira ho lalais, hodi hakat fila-fali ba faze tuir mai no parte BTL, E.P mos konkorda hodi aselera prosesu hirak ne’e hotu.
Atu fó hanoin fali katak, antes ne’e, iha semana kotuk, ekipa ida ne’ebé lidera hosi Ministru PCM halo ona aprezentasaun iha Parlamentu Nasionál (PN), hodi husu ba PN atu ratifika akordu ne’ebé Governu Timor-Leste (TL) asina ona ho Estadus Unidus Amérika (EUA) liuhosi MCC, durante aprezentasaun ne’e, iha mos diskusaun lubuk ida, maibé to’o finál PN konsege aprova akordu refere.
Entretantu fundu ba projetu kona-bá dezenvolve saneamentu, drenajen no setór edukasaun ne'e, Millennium Challenge Corporation (MCC), sei apoia ho orsamentu millaun $ 420 no governu Timor-Leste sei investe mos orsamentu $ 64 millaun, nune'e totál fundu ba investimentu refere hamutuk millaun$ 484.
Entidade ne'ebé partisipa iha enkontru ne'e mak Ministru PCM, Ministru MAE, Sekretáriu Estadu Terras no Propriedade, Ambassador CDT-TL, reprezentante ANLA no SEA no entidade sira seluk.
Share on Social Media:
