Díli, 21/11/2024. Vise-Prezidente Komisaun Ezekutivu (KE) Bee Timor-Leste, Empreza Públika (BTL, E.P) ba Asuntu Tékniku, Sr. José Filipe Ximenes Smith, tun ba terrenu hodi halo monitorizasaun ba servisu melloramentu sistema kanalizasaun bee, ne’ebé paralelu ho projetu alargamentu estrada, iha Aimutin. Atividade monitorizasaun ne'e, hodi observa direta servisu fíziku ne'ebé la'o hela iha terrenu.
Durante iha terrenu, Vise-Prezidente KE BTL, E.P ba Asuntu Tékniku, enkoraja tékniku sira no husu ba sira atu koordena ho lideransa suku no aldeia, hodi identifika komunidade sira ne’ebé seidauk rejista, atu bele halo rejistu, nune’e tékniku sira bele halo ligasaun hosi sistema kanalizasaun foun ne’ebé mak daudaun ne’e instala ona, iha fatin refere.
Iha atividade monitorizasaun ne’e, Ezekutivu BTL, E.P ne’e mos hasoru malu direta ho abitante balun, iha fatin refere no abitante sira hato’o sira-nia preokupasaun kona-bá falta bee moos. No iha biban ne’e, Ezekutivu orienta kedas Koordenadór zona 2 no zona 3 atu toma nota no haree hodi rezolve preokupasaun hirak ne’e.
Iha sorin seluk, Vise-Prezidente KE BTL, E.P ba Asuntu Tékniku, hasoru mos parte OPS PNTL nian no xefe aldeia balun iha Aimutin, hodi informa kedas ba lideransa komunitária ne’e, atu koopera ho ekipa BTL, E.P ne’ebé halo hela servisu iha terrenu no husu mos ba xefe aldeia ne’e, atu identifika no passa informasaun ba nia populasaun sira ne’ebé seidauk asesu ba bee moos no seidauk rejista iha BTL, E.P, presiza ba halo rejistu ou kompleta kritéria ligasaun foun nian, nune’e tékniku sira, bele tun ba halo survey no dada bee ba abitante sira, tuir padraun BTL, E.P nian.
Share on Social Media:
