Díli, 14/06/2023. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Sistema Bee, Saneamentu no Drenajen, Sr. Gustavo da Cruz, akompaña hosi Jestór RP & GIS, Jestór DCQA ho ekipa hamutuk ho Diretora & Diretór sira hosi DNSC/MJ, DNTP, DNTP, STPSC-MD ne’ebé hola parte iha Grupu Téknika Interministeriál (GTI), partisipa mos hosi ekipa CDT-TL, Prezidente Autoridade Munisípiu Díli (PAM-Díli), Administradór postu-administrativu Dom Aleixo no Xefe suku Bebonuk hala’o enkontru ho komunidade afetada hosi projetu Melloramentu Drenajen no Saneamentu iha sidade Díli, liu-liu projetu ETAR Bebonuk. Sorumutu ne’e, realiza iha salaun enkontru, Ministériu Justisa, Caicoli, Díli.
Enkontru ne’e lidera hosi DGTP-MJ liuhosi koodenasaun ho BTL, E.P ne'ebé nudár na'in ba projetu nomos Koordenadór GTI nian, ho objetivu hodi halo negosiasaun ho komunidade afetada hosi projetu ETAR Bebonuk, ba faze daruak nian, hodi rona fila-fali rezultadu konsultasaun ho família afetada sira kona-bá kustu indemnizasaun ba fatin afetadu sira.
Iha sorumutu ne’e, Vise-Prezidente KE BTL, E.P ba Asuntu Sistema Bee, Saneamentu no Drenajen agradese ba komunidade sira nia kolaborasaun no partisipasaun iha negosiasaun faze daruak nian no husu atu komunidade afetada sira atu hato’o hanoin ruma ho transparánsia ligadu ho presu ne’ebé antes ne’e hato’o ona, hodi bele tetu hamutuk.
Iha abertura, Prezidente AM-Díli hatete, sorumutu ohin atu rona hamutuk no koopera, tanba projetu ida ne’e nia benefisiu ba populasaun sira ne’ebé hela iha kapitál Díli. PAM Díli akresenta, kapitál Díli iha momentu ne’e, bele dehan katak enfrenta hela problema barak, liu-liu liga ba investimentu boot sira ne’ebé governu planea atu implementa, wainhira identifika rai ou espasu ruma ne’ebé iha komunidade sira nia leet hodi halo investimentu ruma, governu sei la bá hasai de’it, maibé governu nafatin iha responsabilidade, hodi dignifika komunidade sira, liuhosi oinsá atu fó fila-fali buat ruma, hodi bele fó kompensasaun tuir komunidade sira nia ezijénsia.
Prezidente AMD mos agradese ba komunidade hosi área Bebobuk, liu-liu iha parte afetadadu nian ne’ebé mak koopera hahú kedas hosi inísiu to’o ohin loron no hein katak atu nafatin koopera di’ak liu tan, tanba projetu ne’e la’ós de’it ba parte afetadu sira, maibé di’ak mos ba populasaun sira ne’ebé hela iha Díli, liu-liu iha postu-administrativu Dom Aleixo nian.
Iha fatin hanesan, Diretór DNTP esplika, iha negosiasaun ida ne’e la’ós ho tipu obrigatóriu, maibé konsensu katak parte governu la obriga komunidade afetada sira. Tanba ema hotu-hotu iha hanoin ida katak, hakarak dezenvolve nasaun Timor-Leste, espesialmente kapitál Díli. ho nune’e nafatin husu ba parte afetadu sira nia kooperasaun/kolaborasaun atu hamutuk bele solusiona kestaun ida ne’e.
Iha Oportunidade ne’e, reprezentante CDT-TL husu ba parte rua (governu no komunidade afetada sira) tenke hamutuk buka solusaun ne’ebé mak di’ak, atu labele halakon Estadu, tanba rai afetadu hosi projetu ETAR Bebonuk ne’e, Governu TL mak sei selu, la’ós governu Amerikanu. Tanba ne’e, presiza hanoin no tetu didi’ak ho folin ne’ebé razoavel. Tanba atu dezenvolve nasaun ne’e no labele prejudika investimentu refere, hodi salva rai TL no jerasaun sira iha futuru, desizaun iha ita boot sira nia liman. Parte CDTL-TL mos informa, osan ne’ebé Governu Estadus Unidus Amérika (EUA) liuhosi MCC apoia mai Timor-Leste ne’e, la’ós hodi selu rai afetadu sira, maibé atu investe de’it ba nesesidade povu TL nian, liu-liu iha área rua hanesan projetu melloramentu ba setór saneamentu no drenajen nomos área edukasaun nian.
Hafoin rona tiha informasaun hosi komunidade afetadu sira nomos hosi ekipa GTI durante iha negosiasaun faze daruak nian ne'e, sei fó biban ba na’in ba rai sira, hodi konsulta tan ho família sira kona-bá kustu rai.
Molok atu termina sorumutu ne'e, Ezekutivu BTL, E.P solisita no fó hanoin nafatin ba abitante afetadu sira, atu tetu no husu presu rai ho valór ne'ebé razoável, nune'e labele halakon Estadu nomos bele aselera lalais prosesu refere, hodi kontinua ba faze tuir mai.
Tuir agenda sei ekipa GTI sei enkontru ho komunidade afetada sira iha faze datoluk nian, ne’ebé sei realiza iha loron 27/06/2023, hodi tetu no haree didi’ak ba valór máximu, mínimu no médiu, molok hato’o relatóriu finál ba governu hodi foti desizaun, nune’e hodi hakat ba faze sira tuir mai.
Enkuantu fundu ba projetu melloramentu iha setór saneamentu, drenajen no área edukasaun ne'e, Millennium Challenge Corporation (MCC) apoia orsamentu ho montante millaun $ 420 no governu Timor-Leste sei investe mos orsamentu millaun $ 64, nune'e totál fundu ba investimentu refere hamutuk millaun$ 484.
Share on Social Media:
