Díli, 15/01/2025. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Tékniku, Sr. José Filipe Ximenes Smith akompaña hosi Diretór Enjeñaria no Investimentu (DEI), Jestór Peskiza & GIS nomos Jestór Infraestrutura enkontru ho Diretór no Reprezentante na’in ba kompañia nian, iha salaun enkontru edifísiu BTL, E.P sentrál, Caicoli, Díli.
Objetivu hosi enkontru ne’e, hodi ko’alia kona-bá implementasaun projetu sistema bee moos, iha postu-administrativu sira ne’ebé la’o kleur no la tuir termu kontratu ne’ebé iha, ho nune’e hodi husu ba kompañia sira, atu bele aselera no finaliza lalais projetu hirak ne’e.
Iha okaziaun ne’e, Vise-Prezidente KE BTL, E.P ba Asuntu Tékniku husu ba Diretór no na’in ba kompañia implementadór sira, tenke finaliza projetu fíziku iha finál fulan fevereiru tinan ne’e, wainhira la finaliza tuir tempu ne’ebé determina ona, mak kompañia sira sei hetan sansaun.
Ezekutivu BTL, E.P ne’e hatete, projetu hirak ne’e, BTL, E.P estende ona tempu tuir pedidu hosi kompañia sira, maibé ezekusaun projetu fíziku nafatin la’o kleur no seidauk bele finaliza tuir tempu ne’ebé prolonga ona.
Ho nune’e, BTL, E.P deside hodi fó ultimatu liuhosi karta deklarasaun ba kompañia sira, hodi asina no deklara katak sira prontu no kompromete, atu aselera no finaliza projetu melloramentu no konstrusaun sistema bee iha postu-adminisstrativu sira, tuir prazu ne’ebé sita ona iha deklrasaun ne’e katak, obra fíziku tenke finaliza iha finál fulan fevereiru tinan 2025 ne’e. Wainhira kompañia la kumpri sira-nia promesa ne’ebé sira deklara ona iha karta ne’e, mak BTL, E.P sei fó sansaun ba sira nomos sira prontu atu simu sansaun hosi BTL, E.P.
Enkuantu projetu melloramentu no konstrusaun sistema kanalizasaun bee hirak ne’e, implementa iha postu-administrativu sira no projetu hirak ne’e, balun hahú ezekuta iha tinan 2022 no ba balun iha tinan 2023 nian, maibé to’o ohin loron seidauk bele finaliza tuir termu kontratu ne’ebé antes ne’e BTL, E.P ho kompañia realiza ona.
Share on Social Media:
