Díli, 16/07/2024. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P), ba Asuntu Sistema Bee, Saneamentu no Drenajen, Sr. Gustavo da Cruz akompaña hosi Diretór Diresaun Enjeñaria no Investimentu (DEI), Sr. João Baptista da Cruz Cardoso, Jestór RP & GIS no Jestór DCQA ho tékniku, enkontru ho ekipa hosi Grupu Tékniku Interministeriál (GTI). No reuniaun ne’e, lidera hosi Diretór-Jerál Terras no Propriedades (DJTP), Ministériu Justisa (MJ), Sr. Lucas António da Costa, iha sala reuniaun, Bebora, Díli.
Reuniaun ne’e, hodi halo koordenasaun entre ekipa GTI, atu hadi’a dadus sira relasiona ho prosesu atu liberta rai Bebonuk ne’ebé afeta hosi projetu (Waste Water Treatment Plant-WWTP).
Perante iha reuniaun ne’e, ekipa GTI fixa ona dadus afetadu sira nian no sei submete ba Ministru Justisa (MJ), atu aprezenta bá iha Konsellu Ministru (KM) hodi halo diskusaun molok halo aprovasaun
“Atu hadi’a dadus balun liga ho ita ninia prosesu atu halo libertasaun rai Bebonuk, tanba dadus ne’e, ita halo levantamentu hosi tinan 2022 mai, entaun iha afetadu balun ne’ebé uluk tau xefe família (laen) nia naran maibé mate tiha sira nia kaben (fen) mak substui fali, nune’e mos balun tau sira nia kaben (fen) nia naran maibé mate tiha laen mak substitui fali. Entaun ita fixa tiha naran afetadu sira nomos valór ne’ebé iha, atu nune’e hodi anexu iha rezolusaun governu nian, ne’ebé tuir planu iha semana ne’e, Konsellu Ministru (KM) sei halo diskusaun no apresiasaun molok halo aprovasaun, hodi hasai rezolusaun. Entaun ekipa GTI ohin, tur hamutuk hodi haree no konsolida informasaun sira para envia ba Ministru Justisa hodi aprezenta iha KM nomos iha lista anteriór infraestrutura tolu ne’ebé na’in hosi xineza seidauk tau naran loloos, ohin ekipa esforsu hodi hadi’a, nune’e kuandu rezolusaun ne’e sai karik, ita laiha ona problema kona-bá identidade hosi afetadu sira”, esplika Vise-Prezidente KE BTL, E.P
Enkuantu projetu Sistema Tratamentu Bee Foer (Waste Water Treatment Plant-WWTP) iha Bebonuk, ne’e finansia hosi Governu Estadus Unidus Amérika-EUA liuhosi Millennium Challenge Corporation-MCC ne’ebé servisu hamutuk ho MCA-TL, I.P.
Partisipa iha enkontru koordenasaun ne’e, mai hosi tékniku DNE-MOP, MAP, DNTP-MJ, DNECC-MJ, MCA-TL, I.P no BTL, E.P rasik.
Share on Social Media:
