Viqueque, 04/07/2024, Komisaun Ezekutiva BTL, E.P, Eng. Carlos Peloi dos Reis, akompaña Diretór DEI BTL, E.P, João da Cruz Cardoso, Jestór Infraestrutura BTL, E.P, Kordenadór BTL, E.P Viqueque no Engiñeiru BTL, E.P, hakat ba Postu Admiistrativu Uatucarbau, hamutuk ho Reprezentante PAM Viqueque, Sekretáriu Asuntu Planeamentu Dezenvolvimentu no Investimentu Munisipal, Acacio Sarmento, Administradór Postu Administrativu Uatucarbau, Segundu Komandante PNTL Eskuadra Uatucarbau, Xefe Suku Nain neen, Xefe Aldeia no Komunidade sira, hala’o diálogu kona-bá problema sosiál, relasiona ho projetu konstrusaun bee moos, ne’ebé maka sei implementa iha Postu Administrativu refere, diálogu ne’e rasik halao iha Salaun Administrasaun Uatucarbau.
Prezidente Komisaun Ezekutiva BTL, E.P hatete, reforma DGAS ba BTL, E.P ne’e, ho nia funsaun importante tolu, halo operasaun no manutensaun ba sistema ezistente, promove projetu foun no arekada reseita ba kofre estadu.
Relasiona ho komunidade Suku Uani Uma, ne’ebé impede projetu konstrusaun sistema fornesiementu bee moos
Durante ne’e, komunidade agrikultór sira husi Suku Uani Uma, la konkorda ka rezeita atu implementa projetu bee moos ida ne’e, tamba fonte bee, ne’ebé BTL, E.P halo levantamentu dadus, hodi halo dezeñu no BoQ ne’e, maka bee ulun iha área Uaibati. Abitante hirak ne’e la konkorda ho razaun maka wainhira BTL, E.P foti volume bee balun, ba futuru sei fo impaktu ba sira nia natar, maibé tuir esplikasaun husi parte BTL, E.P katak, ho rekursu bee tuir ánaliza ne’e hamutuk 45 l/s, maibé BTL, E.P sei foti de’it 15 l/s, maibé iha sistema ne’e, BTL, E.P mos sei konstrui Tanke Rezervatóriu besik iha bee matan, tamba ne’e wainhira bee sulin mai Tanke Rezervat’oriu maka nakonu ona, sistema nain rasik taka an, nune’e bee hirak ne’e sei fila fali ba hodi sulin tuir nia dalan.
Prezidente KE BTL, E.P responde ba komunidade nia rekomendasaun katak, atu bele foti rekursu bee iha fatin seluk, hodi kanaliza bee mai iha postu administrativu Uatucarbau, maibé engeñeiru sira halo levantamentu dadus rekursu bee iha fatin seluk kuaze presaun kiik. Alem de ne’e atu foti iha Ira-Bere, maibé sei gasta kustu boot, tamba sei utiliza tan Bombazen, hodi lori bee, nune’e futuru sei afeta ba nia manutensaun. Ho nune’e BTL, E.P nia analiza ne’e foti bee matan iha Uaibitai, hodi kanaliza mai Postu ne’e rasik, atu bele fasilita ba komunidade sira, ne’ebé hela iha Uatucarbau villa.
“ ita sira ne’e, halo servisu ho fuan, hdoi prepara kondisaun ba jerasaun sira tuir mai, hodi garante sira nia kondisaun ne’e di’ak liu ita, para loron ruma ne’e sira ko’alia ita nia di’ak. Hanesan hau nia aman veteranus sira, imi nia maun sira iha nasionál orienta ami halo servisu baziku ida ne’e, ba besik populasaun sira, liu-liu liga ba bee moos”
Sekretáriu Asuntu Planeamentu Dezenvolvimentu no Investimentu Munisipal, Acacio Sarmento hamutuk ho autoridade lokál iha ona lian ida hodi apoia ba projetu ida ne’e, tamba iha projetu hotu-hotu, ne’eb’e durante lao iha munisípiu viqueque, foin primeira vez BTL, E.P investe orsamentu montante boot, hodi kanaliza bee mai iha Uatucarbau, tamba ne’e hanesan autoridade iha prontidaun atu fo apoia ba dezenvolvimentu, ne’ebé relasiona ho povu nia moris.
Maske projetu ida ne’e, atu implementa ne’e, hetan lamentasaun no insatisfasaun husi komunidade husi Suku Uani-Uma, maibé ho prezensa BTL, E.P hamutuk ho autoridade sira, konsege aproxima no konvense hodi bele implementa projetu ne’e. Hafoin hetan konkordansia ne’e Autoridade Munisípal Viqueque no Administradór Postu Administradór inform aba BTL, E.P, atu bele orienta ona kompañia vensedor, hodi bele mobiliza ona material ba terrenu, hodi halo ona servisu.
Iha diálogu ne’e, partisipante maxímu mai husi komunidade husi Suku Irabin de Baixo, Suku Uani-Uma no komunidade sira, ne’eb’e pertense ba postu administrativu Uatucarbau.
Share on Social Media:
