Díli, 13/02/2025. Prezidente Komisaun Ezekutiva (KE) Bee Timor-Leste, Empreza Públika (BTL, E.P), Sr. Gustavo da Cruz, akompaña hosi Diretór Operasaun no Manutensaun (DOM), Aleixo dos Santos, partisipa iha workshop liga ba bee no saneamentu ho tema “Garante fornesimentu bee moos no saneamentu ne’ebé adekuadu, inkluzivu no sustentabilidade ba komunidade sira iha territóriu laran tomak”. workshop ne’e organiza hosi Plataforma Nasionál Bee, Saneamentu no Ijiene Timor-Leste (PN-BESI-TL) no realiza iha salaun Asosiasaun HAK, Farol.
Objetivu hosi workshop ne’e, atu bele fahe informasaun no akumula ideia sira hosi entidade relevante sira, hodi haforsa kooperasaun no koordenasaun servisu ne’ebé integradu, liu-liu polítika no programa sira ba garante fornesimentu bee moos no saneamentu ida ne’ebé adekuadu, inkluzivu no sustentável, iha Timor-Leste (TL).
Iha intervensaun, Prezidente KE BTL, E.P apresia tebes ho inisiativa ba realizasaun workshop regulár ne’e, atu kontinua hafanun no partilla informasaun ba malu, la’os de’it governu mak tau prioridade iha setór ida ne’e, maibé organizasaun no sidadaun hotu ne’ebé iha hanoin di’ak ba dezenvolvimentu rai ida ne’e, ema hotu-hotu iha papel importante hodi kontribui ba dezenvolvimentu, liu-liu iha setór bee no saneamentu.
Prezidente KE BTL, E.P esplika mos papel BTL, E.P nian, atinjimentu sira nomos projetu hirak ne’ebé mak la’o hela iha postu-administrativu sira, inklui esforsu sira iha mandatu atuál nian, hodi halo investimentu, tantu maiór no menór iha nasaun ne’e, hodi liberta povu hosi ki’ak no mukit hosi bee no saneamentu.
Iha okaziaun ne’e, Prezidente KE BTL, E.P hato’o S.E MOP nia apresiasaun ba PN-BESI-TL tanba bele organiza ona workshop ida ne’e no hato’o parabens ba redi BESI tomak nomos forum ONG ne’ebé mak halo advokasia atu oinsá governu bele tau atensaun máximu iha setór BESI.
Mensajen S.E MOP nian, destaka mos kona-bá oinsá atu reativa fali Wash Forum. Tanba liuhosi atividade Wash Forum ne’e, bele fahe informasaun ba malu no bele iha informasaun ida loloos kona-bá atinjimentu BESI nian, ba iha nível rejionál no internasionál nomos bele buka solusaun ba dezafiu, dezentendimentu no ego institusionál sira.
Iha biban ne’e, Prezidente KE BTL, E.P sai mos oradór iha workshop ne’e, hodi ko’alia kona-bá “Polítika BTL, E.P nian ba garante fornesimentu bee no saneamentu ne’ebé adekuadu, seguru no sustentável”. Relativamente ba tópiku ne’e, Ezekutivu BTL, E.P esplika, refere ba Dekretu Lei nú. 41/2020 estabelesimentu BTL, E.P hanesan entidade públiku, ne’ebé ninia papel importante, mak atu garante fornesimentu bee, saneamentu nomos drenajen ba iha territóriu nasionál.
Alen de ne’e, iha mos oradór sira seluk hanesan SEEAS ne’ebé ko’alia kona-bá “Polítika no programa SEEAS nian ba garante fornesimentu bee moos no saneamentu ba komunidade iha territóriu laran tomak”, hosi MAE destaka kona-bá “Polítika MAE nian, liu hosi diresaun-jerál desentralizasaun no governu lokál ba iha dezenvolvimentu bee moos no saneamentu iha munisipiu sira” Enkuantu hosi parte FONGTIL nian kona-bá “Perspetiva sosiedade sivíl nian liga ba bee moos no saneamentu hanesan direitos humanos”.
Entidade ne’ebé partisipa iha forum ne’e, mak governu, ajénsia internasionál, NGO internasionál no nasionál sira ne’ebé servisu iha área bee moos no saneamentu nian, hanesan DNRAS, SMASA, PN-BESI-TL, BTL, E.P, SEEAS, MAE, FHTL, Unicef no partispante relevante sira seluk.
Share on Social Media:
