Manatuto, 18/10/2022, Tékniku Operadór (T.O) Bee Timor-Leste, Empreza Públika (BTL, E.P) munisípiu Manatuto halo manutensaun ba metru kontadór neen, iha Zona Sau, postu-administrativu Manatuto Villa, munisípiu Manatuto.
Tuir informasaun hosi BTL, E.P Manatuto katak, komunidade sira-nia metru kontadór ne’ebé instala iha sira-nia hela fatin la funsiona, nune’e sira hato’o keixa ou hato’o informasaun ba iha BTL, E.P no Koordenadór orienta kedas tékniku sira tun ba terrenu, hodi halo identifikasaun no hatudu katak metru kontadór refere la funsiona ka aat, nune’e tékniku diretamente halo kedas intervensaun, hodi normaliza metru kontadór hamutuk neen ne’e.
Alende ne’e, tékniku sira mos kontinua hadi’a válvula ne’ebé aat durante semana ida ona, maibé daudaun ne’e válvula refere di’ak hikas ona.
Antes ne’e, iha loron 17 fulan ne’e (horseik) tekniku operadór sira BTL, E.P Manatuto halo uluk manutensaun ba kanu distribuisaun bee no metru kontadór balun ne’ebé estraga, iha Zona 4, postu-administrativu Manatuto Villa.
Hafoin tékniku sira finaliza manutensaun ba estragu ne’e, metru kontadór funsiona hikas no sirkulasaun bee hosi liña distribuisaun refere la’o di’ak fila-fali, hodi bele fornese hikas bee ba konsumidór sira, iha área ne’e
Share on Social Media:
