BTL,E.P

Díli, 28/10/2022, Diretór Operasaun no Manutensaun BTL, E.P ho ekipa hamutuk parseiru JICA hala’o enkontru ho Autoridade lokál balun, iha Munisípiu Díli, ne’ebé realiza iha salaun enkontru operasaun no manutensaun, Caicoli.

Objetivu husi sorumutu ne’e, mak parseiru JICA halo aprezentasaun planu jerál  ba tékniku Operasaun no Manutensaun no mos ba Xefe Suku sira, kona-bá implementasaun projetu reabilitasaun ba Intake Bee Moos, ne’ebé hetan estragus iha tempu kalamidade 4 de abril 2021.

Ho akontesimentu kalamidade ne’e, hetan estragus sistema barak, nune’e Governu Japaun liu husi JICA atu apoia Timor-Leste, hodi hadi’a Intake bee Moos iha Tohumeta, ne’ebé durante ne’e distribui bee moos mai iha komunidade sira, iha munisípiu Díli.

Iha oportunu ne’e, Diretór Operasaun no Manutensaun BTL, E.P agredese ba apoiu husi parseiru JICA, ne’ebé kontinua tulun ba Timor-leste, liu-liu iha setór bee.

Direjente ne’e mos husu ba autoridade lokál sira, ne’ebé marka prezensa iha enkontru ne’e, rona aprezentasaun planu jerál ne’e, hodi bele partilla ba komunidade sira, relasiona ho implementasaun projetu ne’e iha future mai.

Autoridade lokál sira mos senti kontente ho projetu reabilitasaun ne’e, tamba komunidade barak iha sira nia Suku halerik nafatin ba bee moos, tamba ne’e ho melloramentu ba sistema ne’e, bele hasa’e volume bee, hodi fornese ba populasaun.

Autoridade lokál sira mos prontu kolabora ekipa BTL, E.P no JICA, nune’e iha implementasaun projetu ne’e, labele iha impedimentu.

Tuir planu katak, Projetu reabilitasaun ba Intake ne’e, sei hahu iha fulan juñu tinan 2023 no sei finaliza iha fulan dezembru 2023.

Autoridade Lokál sira, partisipa iha enkontru ne’e, mak hanesan Xefe Suku Maleuana, Fatuahada, Colmera, Motael, Bairo-Píte no Xefe Suku Tohumeta.

---

Share on Social Media: