Covalima, 21/10/2022, ekipa BTL, E.P, liu hosi Diresaun Operasionál no manutensaun (D.O.M) ho Departamentu Apoiu Kliente no Departamentu jurídiku BTL, E.P, disemina informasaun kona-bá dekretu lei no diploma ministeriál BTL, E.P nian, ba ajente sira mai hosi instituisaun oin-oin nomos ba konsumidór sira, atividade ne’e realiza iha salaun administrasaun munisípiu Covalima.
Ekipa disemmina informasaun kona-bá Dekretu lei númeru 41/2020 loron 25 fulan setembru ne’ebé ko’alia kona-bá kriasaun Bee Timor-Teste Empreza Públika, Dekretu lei númeru 4/2004 loron 11 fulan fevereiru, kona-bá aprova rejime fornesimentu bee ba konsumu públiku, nune’e mos Diploma ministeriál númeru 1/2004 loron 11 fulan fevereiru ko’alia kona-bá tabela tarifária no Diploma ministeriál númeru 1/2009 loron 5 fulan outubru, ne’ebé ko’alia kona-bá fiskalizasaun sistema abastesimentu bee.
Diretór Operasionál no Manutensaun (D.O.M), João da Piedade Brás hatete, BTL, E.P persiza divulga lei ne’e, ba konsumidor sira bele hatene regras, hodi labele viola lei hanesan halo ligasaun ilegál ba bee hosi kanu transmisaun no kanu distribuisaun.
Ho diseminasaun ne’e, ajuda konsumidór sira labele halo ligasaun ilegál no uza sanyo tamba aktu ne’e, sei kontribui reduz presaun bee, ne’ebé fura la tuir padraun tékniku nian.
Alende ne’e, diseminasaun ida ne’e, atu fó koñesimentu ba konsumidór sira, nune'e wainhira ekipa tékniku operadór tun ba terrenu halo melloramentu ba sistema bee moos ne'ebé ezistente no dezvia ligasaun ilegál hirak ne'e, kliente sira bele kolabora.
Reprezentante Administradór Munisípiu Covalima, Víctor Gomes hatete, atividade diseminasaun ne’e importante los, tamba bele fasilita konsumidór sira, bele entende didi’ak dekretu lei no diploma ministeriál ida ne’e, hodi labele viola.
Víctor Gomes mos hato’o parabéns ba BTL, E.P iha munisípiu Covalima, ne'ebé servisu iha siknifikativu tebes, tamba komunidade iha Covalima Villa, uluk halerik beibeik ba bee moos, maibé hafoin BTL, E.P nia prezensa, konsege mellora ona sistema ezistente balun, ho ne’e komunidade sira balun bele asesu ona bee moos ho di’ak.
Atividade diseminasaun ne’e, sei alarga mos ba nível postu-administrativu sira, maibé hafoin termina iha nível munisipál, atu nune’e komunidade sira bele iha koñesimentu ba dekreitu lei no regras BTL, E.P nian.
Share on Social Media:
