Díli, 14/05/2024. Vise-Prezidente Komisaun Ezekutiva Bee Timor-Leste Empreza Públika (BTL, E.P) ba Asuntu Sistema Bee, Saneamentu no Drenajen, Gustavo da Cruz, partisia iha seremónia Lansamentu Relatóriu Temátiku Sensus Populasaun no Uma Kain 2022 hanesan: Lansamentu Relatóriu Temátiku Fertilidade, Mortalidade, Migrasaun, Projesaun Populasaun, Edukasaun no Evolusaun Sexu no Idade, ne'ebé realiza iha Auditóriu Kayrala Xanana Gusmão, Ministériu Finansas (MF), Aitarak-Laran, Díli.
Iha diskursu, Ministra Finansas (MF), Santina J. R. F. Viegas Cardoso konsidera relatóriu temátiku hirak ne’e importante tebes, tanba sai nudár indikadór di’ak ou sasukat ba progresu ne’ebé alkansa ona relasiona ho ajenda globál ba Objetivu Dezenvolvimentu Sustentável 17 (ODS).
Ministra Finansas akresenta dadus ne’ebé kolleta liuhosi ezersísiu sensus nian, sai nudár sasukat di’ak tebes ba governu atu halo planeamentu no alokasaun orsamentu tinan-tinan ba dezenvolvimentu iha setór hotu-hotu ou área temátika idak-idak. No sai mos fontes informasaun kona-bá populasaun idozu hira, idade eskola nian, populasaun feto/mane no seluk-seluk tan. Dadus hirak ne’e, hatudu progresu iha implementasaun ba Planu Estratéjiku setoriál oin-oin ba saúde no edukasaun.
Relatóriu Temátiku Fertilidade, Mortalidade, Migrasaun, Projesaun Populasaun, Edukasaun no Evolusaun Sexu no Idade ne’e, lansa diretamente hosi Ministra Finansas, Santina J. R. F. Viegas Cardoso.
Durante iha seremónia lansamentu ne’e, iha mos aprezentasaun hosi INETL, I.P, kona-bá Relatóriu Temátiku Projesaun Populasaun, Evolusaun Sexu no Idade ba Sensus 2022, Fertilidade, Mortalidade, Edukasaun no Migrasaun.
Share on Social Media:
