Díli, 27/02/2024. Vise-Prezidente Komisaun Ezekutiva Bee Timor-Leste, Empreza Públika (BTL, E.P) ba Asuntu Boa Governasaun no Fortalesimentu Institusionál Sra. Elizabeth Amaral, tun ba terrenu hodi observa no akompaña direta tékniku operadór sira hosi zona 1, 2, 3 no estajiáriu hosi Sentru Formasaun Dom Bosco Fatumaca nian, muda kanu distribuisaun, iha Comoro, postu-administrativu Dom Aleixo, Díli.
Ekipa BTL, E.P no estajiáriu sira muda kanu GS 80mm 3" ne’e, tanba liña distribuisaun refere afetadu hosi projetu konstrusaun estrada diresaun Tasi-Tolu mai Rotunda Prezidente Nicolau Lobato, Comoro. Ho nune’e ohin tékniku sira muda ona, hodi fó espasu ba kompañia konstrutór atu bele halo servisu konstrusaun estrada ne’e.
Enkuantu liña distribuisaun ne’ebé afetadu hosi obra kontrusaun estrada ne’e, ho distánsia metru 60 (60m) no iha tempu badak, tékniku sira sei instala fila-fali kanu ne’e, hodi fornese hikas bee ba konsumidór sira ne’ebé durante ne’e asesu bee hosi kanu refere.
Share on Social Media:
