Díli, 04/08/2024. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P), ba Asuntu Sistema Bee, Saneamentu no Drenajen, Sr. Gustavo da Cruz, horseik, akompaña S.E Primeiru-Ministru (PM), Sr. Kay Rala Xanana Gusmão ho S.E Ministru Obras Públikas (MOP), Sr. Samuel Marçal observa sistema bee, iha Tuana-Laran, suku Villa-Verde, Díli.
Durante atividade observasaun iha terrenu, S.E PM no MOP fó orientasaun ba BTL, E.P atu halo kanalizasaun bee moos ba konsumidór sira iha área Tuana-Laran, suku Villa-Verde.
Hafoin hetan orientasaun, Vise-Prezidente KE BTL, E.P ba Asuntu Sistema Bee, Saneamentu no Drenajen mos orienta kedas Diretór Operasaun no Manutensaun no Jestór O&M atu informa ba konsumidór sira iha área Tuana-Laran katak, tuir regulamentu ne’ebé mak iha, konsumidór sira tenke ba rejista iha balkaun BTL, E.P nian, mak tékniku sira foin bele halo ligasaun bee ba uma.
Alen de ne'e, ohin, ekipa BTL, E.P halo ona teste hodi loke bee no enxe ba tanke rezervatóriu, no etapa tuir mai ekipa BTL, E.P ne'ebé kompostu hosi tékniku O&M no DEI sei halo identifikasaun ba liña distribuisaun ezistente sira, hafoin bele halo ligasaun.
Tanba ne'e husu ba abitante iha área Tuana-Laran, suku Villa-Verde atu koopera hodi hakat ba balkaun BTL, E.P nian, atu rejista, nune'e bele kontinua ba faze kanalizasaun ba uma kain sira.
Share on Social Media:
