𝐃𝐢́𝐥𝐢, 𝟏𝟎 𝐌𝐚𝐫𝐬𝐮 𝟐𝟎𝟐𝟔. Vise-Prezidente Komisaun Ezekutiva (KE) BTL, E.P ba Asuntu Tékniku, José Filipe Ximenes Smith ho Jestór Infraestrutura no Enjeñeiru DEI hamutuk ho Xefe suku Camea, observa bomba ezistente iha estasaun Camea.
Observasaun ne’e, atu prepara hodi opera bomba refere, nune’e bele kanaliza provizória ba komunidade sira ne’ebé hela área Lases no Has-Laran, suku Camea.
Hafoin ida ne’e, Vise-Prezidente KE BTL, E.P ba Asuntu Tékniku kontinua bá haree direta servisu melloramentu sistema kanalizasaun bee, iha STM, Becora.
Durante iha terrenu, Ezekutivu BTL, E.P husu ba abitante sira atu pasiénsia hodi hein servisu melloramentu ne’e finaliza mak foin bele kanaliza bee ba uma kain sira. Maibé komunidade sira tenke bá rejista no halo uluk pagamentu ba ligasaun foun nian, molok tékniku BTL, E.P nian dada bee ba sira-nia hela fatin.
Ohin halo servisu iha terrenu, ekipa O&M identifika no desliga tan koneksaun ilegál direta ba kanu distribuisaun ezistente hamutuk unidade 60, iha área STM nian. Inklui halo mos ligasaun foun no monta metru kontadór ba kliente foun balun ne’ebé rejista ona, iha STM.
Tuir dadus, durante halo melloramentu iha área Becora nian, ekipa BTL, E.P desliga ona koneksaun ilegál hamutuk unidade 150 no ohin hakotu tan unidade 60 no tuir planu, ekipa O&M sei kontinua kontrola no halo identifikasaun to’o Cipol Becora ho distánsia 1300m.
Servisu melloramentu ne’e, nudár intervensaun BTL, E.P nian, hodi responde ba komunidade sira-nia preokupasaun kona-bá falta bee moos. Tanba ne'e, ekipa sei desliga hotu koneksaun ilegál sira ne’ebé durante ne’e prejudika konsumidór sira labele asesu bee ho di’ak, hodi instala mos liña distribuisaun foun, nune'e bele fasilita halo kanalizasaun foun ba uma kain sira ne’ebé rejista no halo pagamentu ba ligasaun foun nian.
Ohin mos, ekipa BTL, E.P instala tanke profil provizória iha STM, aldeia Kakeu-Laran, nune'e atu fasilita komunidade sira bele asesu bee bee moos, hodi hein servisu melloramentu ne'e to'o finaliza.
Servisu melloramentu iha Becora, akompaña hosi Jestór Distribuisaun no apoia mos hosi parte PNTL Eskuadra Postu-administrativu Cristo Rei, hodi asegura seguransa iha terrenu nomos evita engarafamentu no garante movimentasaun transporte públiku no privadu sira iha fatin refere nafatin la'o normál.
Share on Social Media:
