Díli, 02/04/2025. Ekipa Bee Timor-Leste Empreza Públika (BTL, E.P) identifika ona kanu distribuisaun ne’ebé ku’ak/estragadu, iha área Tasi-Tolu,suku Madohi kauza hosi konstrusaun uma armazén ou loja xineza nian.
Ho estragus ne’e, hodi afeta direta ba komunidade sira ne’ebé perténsia ba parte BTN 3 labele asesu bee moos ho di’ak.
Ho kestaun, ohin, Vise-Prezidente Komisaun Ezekutiva (KE) Bee Timor-Leste Empreza Públika (BTL, E.P) ba Asuntu Tékniku, Sr. José Filipe Ximenes Smith ho Vise-Prezidente KE BTL, E.P ba Asuntu Korporativu, Sr. Manuel Tomás Amaral de Carvalho, akompaña hosi Diretór O&M, Jestór O&M ho ekipa tun ba terrenu, hodi observa direta kanu distribuisaun ku’ak/estragadu, iha área Tasi-Tolu, postu-administrativu Dom Aleixo, munisípiu Díli no iha biban ne’e, hasoru mos na’in ba armazén ou loja refere, hodi informa kedas ba sira kona-bá problema ne’e.
Nune’e, hafoin observasaun, iha parte lokraik, Vise-Prezidente KE BTL, E.P ba Asuntu Tékniku no Vise-Prezidente KE BTL, E.P ba Asuntu Korporativu, akompaña hosi Diretór O&M nomos parte Legál BTL, E.P nian konvoka kedas enkontru nain ba loja referidu, hodi ko’alia kona-bá kanu distribuisaun ne’ebé afetadu hosi konstrusaun uma loja nian no oinsá buka alternativa atu rezolve imediatu estragu ne’e.
Nune’e remata enkontru, Diretór O&M ho parte Legál BTL, E.P nian akompaña mos hosi autoridade lokál no OPS, tun ba terrenu hodi notifika nain ba loja ne’e, tanba bazeia ba verifikasaun kanu distribuisaun ne’ebé kotu ne’e, kauza hosi konstrusaun uma loja, ne’ebé ikus mai hamosu prejuízu ba komunidade sira iha área referidu labele asesu ba bee moos.
Tanba ne'e, liuhosi karta notifikasaun ne'e, hodi husu no ejije ba loja nain ho maneira formál, atu reparasaun imediatu ba estragu refere, ho nune’e, xineza ou nain ba loja ne’e koopera no prontu atu atu toma responsabilidade ba aktu hirak ne’ebé sira komete hodi rezulta kanalizasaun públiku hetan estragus.
Hafoin sorumutu entre parte rua, ohin, tékniku sira mos kontinua halo intervensaun iha terrenu, maibé seidauk finaliza, nune’e aban sei kontinua halo servisu ne’e to’o rezolve no bele normaliza fila-fali distribuisaun bee ba konsumidór sira.
Share on Social Media:
