Díli, 04/04/2025. Vise-Prezidente Komisaun Ezekutiva (KE) Bee Timor-Leste Empreza Públika (BTL, E.P) ba Asuntu Tékniku, Sr. José Filipe Ximenes Smith ho Vise-Prezidente KE BTL, E.P ba Asuntu Korporativu, Sr. Manuel Tomás Amaral de Carvalho, akompaña hosi Diretór O&M, tun ba terrenu, hodi monitoriza servisu halo manutensaun iha ETA Lahane, postu-administrativu Vera Cruz, munisípiu Díli.
Alen de ne’e, Ezekutivu nain rua ho Diretór O&M kontinua halo monitorizasaun iha parte Culuhun. Durante observasaun iha Culuhun, parte BTL, E.P identifika mos xineza sira halo perfurasaun rasik no parte BTL, E.P sei hato’o ba DNRAS hodi haree no foti medidas ba kestaun ne’e.
Iha parte lokraik, Vise-Prezidente KE BTL, E.P ba Asuntu Tékniku akompaña hosi Diretór O&M ho tékniku zona 1 hamutuk ho OPS kontinua monitoriza servisu manutensaun ba liña distribuisaun iha BTN 3, Tasi-Tolu nian
Atividade monitorizasaun ne'e, hodi haree direta tékniku sira halo servisu fíziku iha terrenu nomos bele hatene progresu servisu iha Lahane, Culuhun no Tasi-Tolu. Iha okazisaun ne'e, Ezekutivu nafatin enkoraja tékniku sira no husu atu kuidadu aan ou tau importánsia ba seguransa pesoál, durante halo servisu iha terrenu.
Tuir observasaun iha terrenu liu-liu iha parte BTN 3, Tasi-Tolu katak, hafoin reparasaun, bee hahú sulin ona no bele halo ona distribuisaun, maibé presiza hadi’a sistema hotu, nune’e komsumidór sira bele asesu bee hanesan.
Share on Social Media:
