Díli, 09/06/2025, Prezidente Bee Timor-Leste, Empreza Públika (BTL, E.P), Sr. Gustavo da Cruz, Vise-Prezidente Komisaun Ezekutiva Bee Timor-Leste, Empreza Públika (BTL, E.P), ba Asuntu Tékniku, Sr. José Filipe Ximenes Smith, akompaña S.E Ministru Obras Públikas, Samuel Marçal, hamutuk ho parseiru UNICEF iha Timor-Leste no Embaxada China, hodi realiza atividade entrega Tanke Unidadde 25 ho kapasidade 5200 litru, ne’ebé hala’o iha Armajen BTL, E.P, Colmera.
Tanke Bee ida ne’e, apoia hosi governu China, liu hosi parseiru UNICEF, entrega ba BTL, E.P, atu bele responde ba komunidade sira, hodi rezerva bee iha Tanke Bee ho antesipadamente ba akontesimentu área inundasaun no rai monu.
Iha serimónia ne’e, Prezidente KE BTL, E.P, agradese ba parseiru sira nia apoia Tanke Bee ida ne’e, hodi bele distribui ba Munisípiu haat, hanesan Ainaro, Baucau Díli no Ermera.
“Lolos ne’e apoia mai iha 2021, maibé apoia ida ne’e la tarde bai ta, tamba situasaun Elninu, lalina, mudansa klimátika akontese iha ita nia rain, ho apoia Tanke 25 ne’e, di’ak tebes mai iha BTL, E.P fo resposta ba komunidade”.
Embaxadora China iha Timor-Leste, Wang Wenli hatete, lori governu china nia naran, agradese mos ba governu Timor-Leste, tamba bele simu projetu ida ida ne’e.
Embaxadora ne’e realsa, bee maka fonte moris ba labarik no inan aman sira, hodi asesu bee ho seguru, hodi prevene de’it kestaun saúde, maibé kestaun ida maka dignidade no oportunidade ba futuru.
Embaxada ne’e subliña, China sempre kuidadu no fo apoia ba Timor-Leste nia esforsu atu dezenvolve ba infraestrutura no hadi’a povu nia moris di’ak, ho apoia hosi fundu dezenvolvimentu Global no koperasaun hotu, China sei kontinua kopera ho UNICEF iha ámbitu projetu fornesimentu bee no ekipamentu purifikasaun ba komunidade sira iha Timor.
Reprezentante UNICEF iha Timor-Leste, Patrizia DiGiovanni hatete, iha tinan hirak ikus ne’e, inundasaun, ne’ebé akontese bebeik, sai dezafiu boot ba komunidade sira iha territóriu nasionál.
“Hanesan ita hotu hatene iha 2021 akontese inundasaun makaas iha fatin hotu-hotu kauze hosi siklu erozaun, inundasaun akontese ne’e iha timor laran tomak, halo populasaun barak maka evakua ba fatin refuziadu sira, ho inundasaun ne’e afeta mos halakon sistema bee, iha munisípiu Díli, Baucau, Ainaro no Ermera”.
Situasaun hirak ne’e, ameasa ba familia sira nia saúde no seguransa, tamba bee kontaminadu no komunidade balun la asesu ba bee, ho akontesimentu inundasaun iha 2021 ne’e, iha área rural to’o agora seidauk asesu bee hosi sistema ho regular.
S.E Ministru Obras Públikas, Samuel Marçal, husu ba BTL, E.P labele rai deit fasilidade, ne’ebé parseiru sira apoia, maibé tenki utiliza duni, hodi reduz orsamentu. Ho apoia ida ne’e bele fasilita ba komunidade sira iha área rural, tamba bee ne’e importante tebes-tebes ba ema hotu nia saúde.
Partisipa iha serimónia ne’e, Diretór DOM, DAF, Jestora PAM, Kordenadora BTL, E.P Baucau, Ermera no mos ekipa sira seluk.
Share on Social Media:
