𝐃𝐢́𝐥𝐢, 𝟎𝟒 𝐅𝐞𝐯𝐞𝐫𝐞𝐢𝐫𝐮 𝟐𝟎𝟐𝟔. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Tékniku, José Filipe Ximenes Smith no Vise-Prezidente KE BTL, E.P ba Asuntu Korporativu, Manuel Tomas Amaral de Carvalho, hamutuk ho Diretór O&M, Aleixo dos Santos, Ofisiál Legál ho ekipa DAK BTL, E.P, inklui PN-BESI-TL, disemina Dekretu Lei no Diploma Ministeriál, liga ba tabela tarifaria, proibisaun ba koneksaun ilegál no kritéria atu sai kliente BTL, E.P nian ba abitante sira, iha aldeia Avança, suku Bairo-Pité, Postu-administrativu Dom Aleixo, Munisípiu Díli.
Iha atividade sosializasaun ne’e, BTL, E.P partilla informasaun detalla ba abitante sira, liga ba regulamentu ne’ebé abrigu iha Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku”, nune’e mos Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária” no ikus liu Diploma Ministeriál nú. 1/2009 loron 5 fulan Outubru, kona-bá “Fiskalizasaun Sistema Abastesimentu Bee”. Atu nune’e abitante sira bele entende didi’ak regras BTL, E.P nian, liu-liu kona-bá oinsá atu selu tarifa bee, proibisaun ba koneksaun ilegál, labele estraga fasilidade públika nomos oinsá atu halo ligasaun foun.
Objetivu hosi realizasaun atividade sosializasaun ne’e, hodi partilla uluk informasaun kona-bá, knaar BTL, E.P nian nomos regulamentu sira ne’ebé sita ona iha leten ba abitante sira, atu nune’e sira bele entende no apoia BTL, E.P, molok tékniku sira tun bá halo servisu melloramentu ba sistema kanalizasaun bee, iha aldeia Avança.
Vise-Prezidente KE BTL, E.P ba Asuntu Tékniku rekoñese no anota komunidade sira-nia preokupasaun kona-bá susar atu asesu bee moos, ida kauza hosi rekursu bee ne’ebé limitadu no númeru populasaun aumenta, koneksaun ilegál nomos uza sanyo hodi dada/xupa bee, nune’e afeta ba abitante seluk labele hetan bee. Tanba ne’e, BTL, E.P planea ona atu halo intervensaun, hodi desliga koneksaun ilegál sira, nune’e bele mellora sistema kanalizasaun sira, atu bele responde ba populasaun sira-nia preokupasaun hirak ne’e.
Vise-Prezidente ba Asuntu Tékniku husu ba abitante aldeia Avança, wainhira servisu melloramentu ba sistema kanalizasaun finaliza, husu atu uza tuir nesesidade, wainhira enxe bee nakonu ona, tenke taka torneira atu nune’e komunidade sira seluk mos bele hetan bee moos ne’ebé hanesan.
Iha biban ne’e, Vise-Prezidente KE BTL, E.P ba Asuntu Korporativu solisita ba abitante aldeia Avança atu evita halo perfurasaun rasik, tanba sei gasta kustu boot liu, kompara ho presu bee ne’ebé BTL, E.P sei fornese ba komunidade sira. Ho nune’e, husu ba komunidade sira atu pasiénsia, tanba iha tempu besik, BTL, E.P sei halo melloramentu ba sistema kanalizasaun bee iha aldeia ida ne’e, hodi kanaliza bee no fornerse bee moos ba komunidade sira.
Reprezentante Komandante PNTL Eskuadra Dom Aleixo hatete, ohin hanesan oportunidade di’ak ida, atu komunidade sira bele rona direta informasaun ne’ebé sei partilla hosi parte BTL, E.P nian, nune’e wainhira ekipa BTL, E.P tun mai instala, fasilidade bee iha aldeia ne’e, husu atu komunidade sira tenke asegura, sistema kanalizasaun bee moos, ida ne'e perténsia mos ba patrimónia Estadu nian. Nune’e mos, wainhira iha ema balun ne’ebé mak estraga sasan Estadu nian, ida ne'e krime no tenke informa ba lideransa komunitária suku, hodi inform aba parte relevante sira, hodi bele atua.
Diretór PN-BESI-TL hatete, laiha bee ema, animál no ai-horis sira labele moris no bee hanesan direitu umanu, papel boot Estadu liuhosi Governu mak atu hakonu, proteje no garante, liuhosi fornesimentu bee ne'ebé adekuadu ba komunidade sira. Tuir observasaun katak, realidade Timor-Leste nafatin enfrenta problema boot kona-bá bee, maske Governu liuhosi BTL, E.P no parte relevante sira seluk, halo ona esforsu lubuk ida, maibé komunidade nafatin preokupa kona-bá bee. Tanba ne'e, iha prosesu proteje no garante ne'e, presiza mos ema hotu-hotu nia kontribuisaun, hodi apoia wainhira setór bee tun mai halo servisu iha terrenu nomos kontribuisaun taxa bee moos, hodi garante nafatin funsionamentu operasaun no abastesimentu bee moos ba komunidade sira.
Xefe Suku Bairo-Pité agradese ba BTL, E.P tanba bele tun direta bá iha aldeia ne’e, hodi fahe ona informasaun ba komunidade sira, molok implementa servisu melloramentu iha terrenu. Lideransa Suku ne’e husu ba komunidade sira, wainhira instalasaun bee to’o iha ida-idak nia uma ou hetan ona sira-nia direitu, husu atu kumpri sira-nia dever hodi kontribui selu tarifa bee.
Xefe Aldeia Avança rekoñese iha abitante balun fura rasik bee, tanba la asesu bee durante fulan haat, kauza hosi projetu reabilitasaun estrada, iha aldeia ida ne’e no komunidade balun sosa de’it bee hodi uza ba nesesidade loron-loron nian. Maibé ohin, ho prezensa BTL, E.P nian, liuhosi sorumutu ida ne’e, hein katak bele lori rezultadu pozitivu, nune’e bele kanaliza hikas bee ba aldeia Avança.
Durante iha atividade sosializasaun ne’e, lideransa suku no komunidade sira hato’o sira-nia preokupasaun kona-bá falta bee moos, rekomendasaun no susjestaun balun, BTL, E.P anota no sei haree oinsá bele halo intervensaun, hodi responde ba kestaun hirak ne’e.
Relativamente ba preokupasaun hirak ne'e, Diretór O&M hatete, BTL, E.P anota sujestaun no preokupasaun sira, ho nune’e atu hatan ba problema bee iha aldeia ne'e, mak BTL, E.P sei halo intervensaun liuhosi mellora sistema kanalizasaun bee, atu nune'e hodi kanaliza no fornese bee ba komunidade sira.
Partisipa iha atividade sosializasaun ne’e, parte seguransa PNTL, Reprezentante PAM Díli (SMASA Díli), Lideransa Komunitária no abitante sira hosi aldeia Avança.
Share on Social Media:
