Manatuto, 15/02/2023, Tékniku Operadór (TO) Bee Timor-Leste, Empreza Públika (BTL, E.P) munisípiu Manatuto fahe ba ekipa rua, hodi halo servisu hanesan hakotu ligasaun bee iha kliente sira nia uma, iha suku Ma’abat nomos halo manutensaun ba liña distribuisaun bee, iha suku Aiteas, postu-administrativu Manatuto Villa, munisípiu Manatuto.
Tékniku BTL, E.P Manatuto hetan orientasaun, hodi dezliga ligasaun bee iha kliente sira nia hela fatin, tanba sira la kontribui hodi selu tarifa bee moos durante fulan haat ona, maske kliente sira ne’e asesu hela kanalizasaun bee hosi BTL, E.P. Enkuantu uma kain sira ne’ebé mak durante ne’e la selu taxa hamutuk uma kain tolu, iha Zona Ma’abat nian.
Hafoin hakotu ligasaun bee ne’e, ekipa téknika enkoraja no informa ba konsumidór sira, atu koopera hodi selu taxa bee moos, wainhira sira selu mak tékniku sira sei tun ba terrenu hodi halo fila-fali ligasaun bee ba komunidade sira nia hela fatin. Hafoin rona tiha informasaun ne’e, abitante sira promote katak sira sei koopera hodi selu tarifa bee.
Alende ne’e iha loron hanesan, ekipa téknika ida seluk halo servisu manutensaun ba liña distribuisaun bee ne’ebé ku’ak ou nakfera, iha Zona Aiteas, suku Aiteas. Manatuto Villa.
Hafoin identifika kanu nakfera iha rai okos, tékniku sira obrigatoriamente tenke ke’e sai alkatraun, iha parte estrada públiku ne’e, atu nune’e tékniku sira bele hadi’a liña distribuisaun refere, hodi garante nafatin distribuisaun bee ba kliente sira. Enkuantu servisu ne’e rasik seidauk finaliza no dadaun ne’e la’o hela iha terrenu.
Share on Social Media:
