Ermera, 10/01/2023, Tékniku Opreadór (TO), Bee Timor-Leste, Empreza Públika (BTL, E.P) munisípiu Ermera halo manutensaun ba kanu transmisaun 3” iha ne’ebé instala liuhosi estrada públiku ne’ebé lokaliza iha aldeia Borhei, suku Humboe, munisípiu Ermera.
Liña transmisaun ne’ebé tékniku sira hadi’a ne’e aat tanba kanu refere tuan no feruzen, nune’e rezulta kanu kotu ou nakfera, prejudika sirkulasaun bee ba Estasaun Tratamentu Bee (ETA) Riheu iha aldeia Gombei, suku Riheu, ne'ebé durante distribui bee ba zona Bugasa.
Hafoin identifika estragus ne’e, tékniku sira mobiliza materiál tun ba terrenu, hodi halo intervensaun ba estragus refere, hanesan solda no troka hikas kanu ne’ebé estragus, nune’e bele garante sirkulasaun bee ba ETA Riheu, hodi fornese hikas ba komunidade sira.
Tuir informasaun hosi terrenu, hafoin servisu manutensaun loron ida, tékniku sira konsege finaliza no normaliza estragus refere no tékniku sira distribui hikas ona bee ba ETA Riheu hodi enxe rezervatóriu sira, nune’e bele fornese fila-fali ba konsumidór sira, ne’ebé durante ne’e asesu bee hosi ETA Riheu.
Share on Social Media:
