Ermera, 26/09/2022, Ekipa Tékniku Operadór (T.O) Bee Timor-Leste, Empreza Públika (BTL, E.P) munisípiu Ermera solda kanu distribuisaun bee 4”, ne’ebé lokaliza iha Zona Maudia, Fatukeru, aldeia Ervilhate, suku Laura, munisípiu Ermera.
Tuir informasaun hosi BTL, E.P munisípiu Ermera katak, kanu distribuisaun bee, ne’ebé kotu ne’e, kauza hosi movimentasaun veíkulu ne’ebé transporta ekipamentu pezadu, liuhosi fatin ne’e mak hodi sama direta ba kanu refere, nune’e afeta ba liña distribuisaun kotu.
Koordenadór BTL, E.P Ermera informa, ho estragus ne’e, difikulta fornesimentu bee ba komunidade sira ne’ebé asesu bee hosi liña distribuisaun refere, maibé hafoin tékniku sira identifika, sira mobiliza kedas materiál hodi halo normalizasaun ba kanu distribuisaun bee ne’e.
Hafoin normalizasaun ba liña distribuisaun ne’e, sirkulasaun bee la’o di’ak no bele garante hikas fornesimentu bee ba konsumidór sira, iha área ne’e.
Share on Social Media:
