Lautém, 27/09/2022, Ekipa Tékniku Operadór (T.O) Bee Timor-Leste, Empreza Públika (BTL, E.P) munisípiu Lautém hamutuk ho traballadór nain 8, iha loron 26 fulan setembru tinan ne’e, instala metru kontadór foun unidade 17 ba komunidade uma kain 17, iha aldeia Bee Moris, suku Fuiloro, postu-administrativu Lospalos, munisípiu Lautém.
Tuir informasaun hosi BTL, E.P munisípiu Lautém katak, alende instalasaun metru kontadór foun, ekipa tékniku sira mos troka metru kontadór bee konsumidór nian ne’ebé mak aat, hamutuk unidade rua, iha aldeia Bee Moris, suku Fuiloro.
Koordenadór BTL, E.P Lautém informa, iha biban ne’e mos, ekipa konjunta ne’e, identifika koneksaun ilegál, iha suku Fuiloro, nune’e tékniku sira deside, hodi dezliga koneksaun ilegál refere, tamba hamenus presaun bee no tékniku sira informa ba komunidade sira atu ba rejista iha BTL, E.P
“Ba koneksaun ilegál sira ne’e, orienta tékniku sira hodi taka urjente, ohin tékniku sira dezliga sanyo ida ne’ebé komunidade sira utiliza hodi dada bee nomos ligasaun ilegál tolu ne’ebé liga direta ba kanu distribuisaun. No tékniku sira mos fó hatene ba uma na’in sira, atu ba halo rejistu no selu tafira iha edifísiu BTL, E.P, wainhira sira rejista ona, mak orienta fali tékniku sira bele ba monta fila-fali sira-nia bee, tamba ami-nia alvu ou tarjetu ba loron 14 nia laran, tenke hasai hotu koneksaun bee ilegál sira”, dehan Koordenadór BTL, E.P Munisípiu Lautém.
Durante ne’e, BTL, E.P munisípiu lautém halo ona identifikasaun dadus no konsolidasaun ho komunidade sira, iha kada bairo ou zona ne’ebé eziste iha munisípiu refere, hodi informa kona-bá regras sira hanesan ligasaun bee no konekasaun bee ilegál, maibé komunidade balun kontinua halo koneksaun ilegál.
Share on Social Media:
