Díli, 29/11/2022, Ekipa Bee Timor-Leste, Empreza Públika (BTL, E.P kompostu hosi Tékniku Operadór (TO) Zona 4 hamutuk ho Zona 6,7,8 no 9 kontinua halo melloramentu ba sistema bee, iha aldeia Moris ba Dame, suku Bairo-Pité, iha postu-administrativu Dom Aleixo, munisípiu Díli.
Koordenadór BTL, E.P Zona 4 informa, tékniku operadór 4 to’o 9 servisu hamutuk hodi halo melloramentu bai ha área refere, tanba identifika katak bee sulin estraga, tamba kanu distribuisaun sira ku’ak, nune’e mak durante ne’e prejudika abitante balun la asesu ba bee moos, tanba ne’e, tékniku sira halo identifikasaun no halo kedas intervensaun ba sistema hirak ne’e, nune’e bele garante abastesimentu bee ba konsumidóe sira.
Iha atividade melloramentu ne’e, tékniku sira troka kanu ne’ebé aat ou nakfera ka ku’ak, troka válvula ne’ebé aat no tuir planu hafoin servisu ida ne’e remata, sei instala mos metru kontadór bee ba uma ida-idak, nune’e bele hafasil tékniku sira halo kontrolu nomos bee bele sufisiente ba ema hotu.
Iha imajen hatudu katak, ohin tékniku sira ke’e rai, hodi hakoi kanu distribuisaun foun, atu nune’e labele hetan estragus. No tuir planu atividade melloramentu ne’e, sei kontinua ba aldeia no suku sira seluk ne’ebé ho problema hanesan, hafoin remata servisu iha fatin refere.
Share on Social Media:
