Aileu, 04/11/2022, Tékniku Operadór (T.O) Bee Timor-Leste, Empreza Públika (BTL, E.P) munisípiu Aileu kontinua halo melloramentu ba kanu distribuisaun bee, iha aldeia Kotbauru, suku Malere, postu-administrativu Aileu Villa, munisípiu Aileu.
Tékniku sira kontinua halo melloramentu ba liña distribuisaun bee ne’ebé deskonfia ema deskoñesidu mak halo ku’ak, ho estragus ne’e prejudika abitante sira ne’ebé durante ne’e asesu bee hosi kanu distribuisaun refere, labele asesu ba bee moos.
Tékniku operadór sira nafatin esforsu hodi manutensaun ba liña distribuisaun ne’e, nune’e hodi bele garante fornesimentu bee ba komunidade sira iha suku refere.
Alende ne’e, ho hahalok fura ku’ak kanu ne’e, difikulta bee labele to’o ba komunidade sira ne’ebé mak asesu bee hosi liña distribuisaun ne’e rasik.
Ho estragus refere, BTL, E.P kontinua husu ba abitante sira, atu koopera ho BTL, E.P hodi labele estraga sistema hirak ne’e no husu atu nafatin tau matan ba sistema bee hirak ne’ebé instala ona iha komunidade sira-nia bairo aldeia no suku sira, nune’e fó biban ba BTL, E.P hodi haree no halo fila-fali servisu seluk liu-liu liga ba sistema bee moos, ba komunidade sira iha fatin seluk ne’ebé mak seidauk asesu ba bee.
Share on Social Media:
