Díli, 15/12/2023, Prezidente Komisaun Ezekutiva BTL, E.P, Eng. Carlos Peloi dos Reis, Vise-Prezidente KE BTL, E.P, ba Asuntu Sistema Bee Saneamentu no Drenagen, Gustavo da Cruz, Vise-Prezidente KE BTL, E.P, Elizabeth Amaral, hamutuk ho Diretór, Jestór no Kordenadór BTL, E.P Destakadu iha Munisípiu sira, halo Retiru BTL, E.P nian ba servisu iha periodu 2023 ho nia tema “ Hametin Kordenasaun hodi Atinji Objetivu Hamutuk”, Atividade retiru ne’e, realiza iha Salaun Sentru Formasaun Profesional Tibar.
Iha Retiru ne’e, Komisaun Ezekutiva BTL, E.P, Kordenadór BTL, E.P destakadu Munisípiu Jestór no Diretór sira, halo aprezentasaun ba atinjimentu servisu durante tinan ida nian, hahu iha fulan janeiru to’o dezembru. Nune’e mos aprezenta planu servisu, ne’ebé sei implementa iha 2024.
Husi aprezentasaun ba atinjimentu servisu ne’e, bazeia ba planu no atividade, ne’ebé trasa iha tinan ne’e, balun atinji ona 100% no balun iha hela prosesu, nune’e sei kontinua fila fali iha 2024, maibé servisu esensial, ne’ebé governu impoin ho indikador tolu hanesan, Melloramentu ba Sistema Ezistente, Promove Projetu Foun no Arrekada ka Rekollla reseita ba kofre Estadu ne’ebé hatudu mudansa kompara ho tinan kotuk. Hare husi rezultadu aprezentasaun ne’e maka iha Kapitál Díli no kapitál munisípiu sira seluk, ho tékniku operadór sira, ne’ebé destakadu ona iha munisípiu Díli no munisípiu sira halo servisu diariamentu hodi halo melloramentu ba sistema bee ezistente sira, ne’ebé kontinua halo ligasaun bee ba uma kain sira, hodi fasilita komunidade sir abele asesu bee ba nesesidade loron-loron.
Hafoin aprezentasaun ne’e, Prezidente Komisaun Ezekutiva BTL, E.P, halo observasaun jerál ba retiru ne’e katak, ho rezultadu servisu, ne’ebé ekipa konkretiza servisu iha tinan ne’e iha mudansa tebes, tamba ne’e hakarak hato’o agredese wa’in ba ita hotu nia kontribuisaun no dedikasaun tomak, maske hasoru dezafiu no obstakulu oi-oin, maibé nafatin hatudu vontade hodi dezenvolve iha setór bee no saneamentu, ne’ebé di’ak liu.
Iha biban ne’e, Komisaun Ezekutiva husu ba direjente no funsionáriu sira hotu, atu kontinua servisu ho prestasaun di’ak no displina, hodi lori bee no saneamentu, ba komunidade sira, ne’ebé seidauk asesu bee no saneamentu iha territóriu nasionál.
Share on Social Media:
